2016年6月1日 星期三

Kayak price alert航班及酒店報價提示


本篇使用粵語。
本篇所有截圖均出自Kayak.com


落實咗新旅程,月尾出發,將會用番Kayak.com嚟幫我睇住酒店房價,不如順便發篇文介紹俾大家,好易用,又免費。Kayak係一個旅遊相關嘅搜尋器,當中嘅price alert功能可以set機票票價提醒同酒店房價提醒。之前北極個trip幫我慳咗過千蚊酒店房價。

佢個機票alert我好少用,因為通常一出promo就買,所以對於我作用不大,反而留意多啲網上情報仲好。但酒店呢,好多時book完房係有得免費取消架嘛,我會訂完房後set番個酒店報價,個系統會幫手每日quote價,但凡有價格變動,不論係貴咗定平咗都會自動send email提醒,咁你見個價平咗就可以取消之前個booking再訂過。而我哋已經試過好多次因為行程改變或者價格改變而取消喺booking.comhotels.com嘅訂房,係真係免費取消嘅,啲退款會落番信用卡度,冇額外收費,但要留意free cancellation個限期,過咗就固然會有收費喇!

上年北極三島個trip呢,Svalbard間酒店我喺訂完四晚房之後就setalerts,之後有兩晚真係突然間平咗,其中一晚由原本1800港紙減到去1300港紙,於是我即刻book過嗰晚,然後取消番舊嘅booking。一星期後另一晚更加由1800劈1200,前後慳咗過千蚊。雖然最後仍然有兩晚係原價,但都已經好開心喇!

不過聲明先,唔係次次有收穫架,我驚大家會失望,好似我沖繩trip咁,set咗後只係見到個房價越嚟越高,甚至通知已經冇房報唔到價,咁得個知字囉,知道自己早咗book平啲同有房都開心嘅!


好喇,點set price alert呢,先去上圖https://www.kayak.com/alerts開個account先。


登入後個版面好簡單,見上圖。圖中下方Subscriptions嗰度你睇想唔想收資訊喇。Set價格通知的話,淨係用上方add a flight alert或者add a hotel alert(紅圈)就夠喇。


我示範加酒店房價提示啦,見上圖,可以直接輸入目標酒店個名,其中max price同酒店星級可以留空。特別重要嘅係記住剔選收email通知,同黃圈嗰度要揀Daily,因為之前我個成功例子呢,嗰兩晚酒店都只係減咗一日,之後變番晒原價,所以set一星期先收通知就冇乜意思喇。

另外,如果係連續住同一間酒店幾日,建議分日set alert,咁你會好容易睇到邊晚平咗。

好喇,可能你會問點解唔訂酒店之前set呢,其實係絕對可以架,尤其仲有好長時間先出發,路線又未係好確實嘅。只係我習慣睇啱就買,所以買完先set啫,訂前set定訂後set純粹個人喜好。


至於點停個提示呢,超簡單,log-inkayak account,想刪除邊條提示就按delete


另外,skyscanner都有免費alert,不過只有機票價格提示,有興趣不妨試玩吓。



「Venus遊世界」總目錄



您可能會對以下博文感興趣:
海洋博 紐約 南極 台北
沖繩行程篇
美國紐約
南美南極資訊
台北


Copyright © 2016 by Venus. All rights reserved.

20 則留言:

  1. 你真係世上好女人...有野唔收埋仲教埋我地....鍚鍚*3*
    係呢~~~~野~~~~話俾姐姐知~~~月尾去邊~~~~~~~~~~~~~~~~~~~~~~~~~~~~~~

    回覆刪除
    回覆
    1. 俾妳笑c, 誇張到呢..呢篇都唔花時間, 一陣就寫晒 ^^
      咦, 做乜又野人, 妳唔野我都講妳知架喎 ;p 小t妹妹, 我飛奧地利呀, 其實之前去過喇, 不過悠久到個blog冇寫過, 我覺得我個blog係唔應該冇奧地利架, 所以take 3 囉

      刪除
    2. 華!!!唔係take 2添喇???係take 3!!!
      睇黎你好鐘意呢個地方~~~~唔通同你鐘意音樂有關???

      刪除
    3. 係呀, 嚟緊係第3次喇
      鍾意呀, 的確係同讀咗兼學咗咁多年音樂有關 ^^

      刪除
  2. 你好精明呀!! 我都有用Skyscanner做alert, 去旅行可以慳到夠食一餐架. 同一樣野唔同價錢, 當然要計下數先.

    回覆刪除
    回覆
    1. 我鍾意用skyscanner search機票呀, 但就少落alert, 佢個search engine幾強, 好僻啲路線都出到, 咁plan行程時有個概念, 邊啲地方可以用飛機 ^.*
      同一樣嘢唔同價唔抵嘛, 反正set個alert唔洗幾多時間, 冇壞呀 :)

      刪除
  3. 回覆
    1. 嘩, 有排喇, 仲積咗幾個遊記, 年尾慢慢清 ^.^"

      刪除
  4. 依家有喱類格價網又真係方便好多慳返唔少喎

    回覆刪除
    回覆
    1. 係囉, 訂前格一次價, 訂後繼續格 ^^

      刪除
  5. 回覆
    1. 係呀, 之前有啲景點未去晒, 所以再去玩過 :)

      刪除
    2. 唔..因為機票都係上星期先買, 所以未plan好呀, 但湖區, 山區都會去, 想順便過一過德國南部嘅新天鵝堡添, 因為上次去嘅時候外牆維修, 想去睇番城堡個靚靚外型

      刪除
    3. 我前年到新天鵝堡,外牆已維修完畢了,
      妳今次可以喺新建玻璃展望台觀看全貌了😊😊

      刪除
    4. 好呀好呀, 有新嘢睇, 咁好大條道理再去喇 ^.*

      刪除
  6. 咦! 有D咁樣樣嘅野?等我有機會都試下先~

    回覆刪除
    回覆
    1. 好呀! 但唔好抱有期望會好啲, 因為沖繩嗰次我真係有失望嘅感覺 >.<

      刪除