Day 8 走到世界盡頭──阿根廷烏斯懷亞Ushuaia

**南美、南極篇使用粵語

未到凌晨四點已經到咗大堂集合，咁唔正常嘅時間，當然冇正常嘅早餐食喇！其實我最鍾意食早餐，啲嘢啱食又冇咁油膩，宜家早到連個正常早餐都冇埋 >.< 酒店準備咗啲麵包同飲品，喺遊魂狀態兼頭痛嘅情況下當然係冇胃口喇。

知道被安排凌晨4:15集合呢，係有啲嬲架，因為郵輪公司有班包機朝早7:00先集合，全機都係郵輪客，仲有郵輪職員跟足全程，但我哋嗰班只係普通航班，仲要早到咁離譜。話晒都係郵輪公司嘅Ambassador member喎，點解會咁樣對啲忠實顧客架！不過唔想表現得咁mean，所以就算唔鍾意都習慣停一停、諗一諗：或者係我哋遲join，架charter flight已經full咗呢！於是唔出聲住，睇埋之後啲安排先！

天都未光就上旅巴出發去機場喇！

估唔到咁嘅時間架機都幾近滿座，見到剛才一齊坐旅巴嚟嘅郵輪朋友坐晒喺偏後嘅位置，我哋竟然坐第二行喎，啲位好闊吓，睇嚟郵輪公司喺劃位上有安排過，咁都算係差中嘅好喇！

難得早起過個太陽，試問人生有幾何睇日出，或者侷早都係一件美好嘅事！

三個幾鐘後，見到圍住Ushuaia嘅山喇！

終於到世界嘅盡頭，Ushuaia喺阿根廷南端一個叫火地島嘅地方，上圖紅色方框，大部份南極郵輪都會喺Ushuaia出發。圖中灰色線係國界，而綠圈係智利嘅Punta Arenas，去南極嘅飛機就喺嗰度出發。

攞完行李離開禁區，見到好多職員拎住郵輪公司嘅牌，佢哋會收番我哋嘅行李，然後叫我哋按番想聽邊種語言嚟揀車上，近門口嗰架已經係英語，冇再八仲有咩語言，我諗都係跟船上嘅lecture一樣分英語同德語喇。

行出室外，感受到極地嘅氣息！一月係正正夏天，全年溫度最高嘅月份，可能係朝早啦，得8度咋，踏足世界盡頭係一個小夢想嘅實現，呢種興奮足以對抗寒風。其實..可能又係上天最好嘅安排，早啲到Ushuaia唔好咩？！

開始Ushuaia嘅tour喇，先去Aeroclub、Afasyn遊艇俱樂部嗰邊影番Ushuaia全景。

沿途導遊話宜家嘅Ushuaia係個有五萬幾人口嘅城市，當初政府為咗吸引多啲人嚟住就行免稅政策，所以到宜家喺Ushuaia買嘢都係免稅嘅。

上圖最左方嗰幢外型獨特嘅建築係賭場。

MS Fram到咗喇，期待上船，白紅黑嗰艘就係喇！

之後旅巴駛入Ushuaia最旺嘅San Martin街，導遊沿路介紹吓啲店舖同餐廳，然後就喺碼頭附近解散，兩個半鐘之後集合番。

天色愈嚟愈好，全個天都係藍天白雲。

 Ushuaia係世界上最南端嘅城市，因此有世界盡頭之稱，所以去Ushuaia的話，呢個牌係必影嘅！西班牙文fin del mundo就係End of the world嘅意思。

海邊嘅旅行社

喺遊客中心可以攞免費證書同喺護照蓋印。

以當地建築風格建成嘅政府大樓，上數圖係正面同背面。

以上兩座建築都係End of the World Museum

海事及監獄博物館

Iglesia Nuestra Señora de la Merced，唔知乜教堂，顏色幾sharp ^^

郵政局

廣播電台

有趣嘅監獄故事館

行咗陣覺得好需要搵個地方休息吓，於是搵間餐廳坐低，揀咗導遊話食海鮮好出名嗰間。餐廳細細，好在未夠十二點已經入座，坐低冇耐就full house，當中有兩枱係同坐旅巴嘅郵輪朋友，睇嚟大家都有聽導遊講嘢噃 ^^

睇餐牌，冇Buenos Aires啲牛扒咁驚喜，不過海鮮嘛，都唔算貴。

望住個餐牌冇乜idea，所以叫侍應介紹受歡迎菜式，我哋想食皇帝蟹同魚，佢介紹咗下面呢幾樣。

皇帝蟹奄列雖然油咗少少，但味道好好，非常滿意！

炒皇帝蟹用料足，有好多蟹腳，食得出幾新鮮，都滿意。

個Trout嘅賣相幾吸引眼球，味道都ok。

最讚係侍應服務好，呢餐大約400蚊港紙。

市內一隅

巧遇消防車，車身有卡通咁可愛嘅 ^^

觀光巴士

世界盡頭都有HSBC，利害！

當地銀行

貝隆夫人紀念像

其實食飽後見好多店舖收咗，條街靜晒，原來係午休時間。好在都差唔多要上番車，於是返海旁嘅旅巴停泊處附近影吓相。

動人嘅藍！雖然中午時份好曬吓，不過有海風伴住涼涼哋咁行得好舒服，個人都精神番晒！

到集合時間喇，又總係有人遲到嘅，我哋個導遊好霸氣，等咗陣見隔鄰架旅巴都係等緊人就話我哋開車先，叫隔鄰順便pick up埋我哋架車嗰幾個。

15年9月先搭MS Fram去Three Arctic Lands，16年1 月再搭MS Fram去南極，喺度足足生活咗一個月，載住我哋由北玩到南。雖然呢間郵輪公司兩次嘅行程安排都唔係盡善盡美，但對呢架郵輪真係好有感情，望住啲相，又好掛住MS Fram喇！

同上次一樣，我哋都係買unspecified outside cabin，有窗知道出面有咩睇好緊要。上次未係Ambassador member呢，編配到間standard房，行李箱唔可以長開，開嚟攞完嘢就要合番埋，否則會冇路行（睇番上次間房http://venushk.blogspot.hk/2016/04/longyearbyen.html#outsidecabin）

但今次做咗member就好唔同喇，兩個行李箱開晒仲有位走動，俾間咁正嘅房，兩個幾星期住得舒服啲，真係好～感～動！睇嚟loyalty呢家嘢真係好重要！

入到房見到枱頭放定member嘅歡迎信同小禮物，仲有要睇嘅資料。

我哋係早上船嗰批，上船後仲有幾個鐘先啟航，於是去斟吓嘢飲

去甲板影吓景

聽吓甲板嘅風聲，仲未開船啲風已經好唔嘢少！

啲陣風好勁，每次強陣風一過，就會睇到風嘅蹤跡，海面即時出現白頭浪，捕咗好多次終於影到一張喇！睇到啲風由左去右，偏右方白色嗰個位係風嗰刻嘅位置，睇住喺海面弧形咁一路去，好靚呀！

跟住周圍去睇吓啲設備有咩唔同咗，我發現concierge啲座地燈同枱椅擺位唔同，今次應該唔會成日俾人撞冧盞燈喇，老公就發現部遊戲機變咗做PS4，有進步喎！

跟住到tea time，仲有好多人排緊隊check-in，我哋差唔多包場。

Safety drill之前去交medical form，然後上甲板影多次相。

今次Safety drill有改善呀，好快完成。

跟住食晚飯，趁冇乜人拿拿林影吓食物先，今次換咗個女廚，啲嘢好食咗。郵輪朋友數過，總共有四十幾餐buffet，堅大劑，要食得好有self-discipline先得喇 >.<

開咗船又上甲板影多轉，我覺得南面嘅海水真係特別藍！

日落又捕一捕

晚上9:30有歡迎會

Captain Rune Andreassen

大家留意吓Captain後面，相中最左邊嗰位係來自中國嘅新expedition team member，佢係郵輪公司第一位聘請嘅內地科研專家，北京大學嘅生物保育博士。因此呢船我哋好著數，有部份宣佈會用埋普通話。通常船上廣播都係先英語，後德語，有時一miss咗宣佈就要打電話問番，今次就正喇，仲有一次機會，可以聽埋普通話宣佈。不過啲Expedition team members每次換人，所以唔包保次次都有中國人。

今次呢船expedition team members裡面，有五個喺北極個trip已經見過，個個都超好記性，主動走過嚟寒暄，好warm喎，估唔到咁多客都認得我哋。

夜晚仲有件驚喜事，話說郵輪要喺海上航行一段時間先到南極，正好上網打發吓時間，於是走去買wifi時數，反正可以分段用，就買最多嘅六個鐘嗰種。點知front desk職員冇嘟我張房咭記數，我就提佢啦，阿大好人笑笑口揮手示意唔洗。之後我諗番上次北極個trip又係遇到佢，當時我去買兩個鐘wifi，佢就俾咗六個鐘我，我傻傻吓以為係因為wifi慢所以個個客都會俾多啲，到今次先知原來係特別優待嚟嘅，超唔好意思添！用完六個鐘之後，我專登揀大好人off duty先搵另一個買。上次個trip呢，有時路過front desk會幫手翻譯吓，所以我諗呢個係未有預算嘅回報，多謝大好人！

到南極郵輪、阿根廷、巴西伊瓜蘇2016目錄頁

到「Venus遊世界」總目錄


您可能會對以下博文感興趣:

加拿大白馬2015	冰島南部2013	格陵蘭海上看北極熊2015	新西蘭奧克蘭2014