2016年8月7日 星期日

Day 5-7 阿根廷布誼諾斯艾利斯Buenos Aires


**南美、南極篇將全部使用粵語

Day 5


旅程嘅第五日,起身食完早餐後返房執嘢,我哋會搭下晝一點幾嘅LAN智利航空客機飛番落首都Buenos Aires



喺酒店call車去伊瓜蘇機場,個機場細細哋、舊舊哋,臨上機開始落大雨,要衷心感謝之前兩日嘅充沛陽光!



起飛後沿住巴拉那河飛,河嘅對岸係巴拉圭嘅土地。





話咁快就個幾鐘,迎來嘅係Buenos Aires嘅晴空,鳥瞰呢個咁大,睇落咁繁華嘅大城市,喺度諗我對當地治安嘅緊張同擔心係咪多餘!當然,諗吓啫,唔鬆懈得嘅,空穴來風必有因,梗係有人試過被偷被搶先會有傳聞傳開。正如你問我覺得邊度最危險,我一定答巴黎,因為親身經歷嘛!





等行李時可以埋call車公司櫃位格價,今次幫襯TransAir。


ARS220去酒店,即百零蚊港紙,可以用信用卡付款。


攞行李出禁區後,理應去counter報到等司機嚟接,但我哋想去唱錢先,於是行咗過另一個terminal。唱完錢後見呢個terminal都有TransAir櫃位喎,於是埋去問職員喺度等司機得唔得,yeah,個職員話冇問題,慳番腳力。等咗一陣就有司機嚟pick up我哋,櫃位職員會講俾司機知我哋去邊度。




返番嚟Casa Calma喇,呢間酒店喺Day 2讚過,從外觀同大堂可以睇得出係一幢細型嘅酒店,喺Tripadvisor嘅排位同評價都好高。我欣賞佢嘅服務、front desk職員嘅流利英語同埋房間嘅空間感,不過衛生狀況只屬好唔錯,係未到一塵不染級別嘅。





房間環境





有個按摩缸可以影相、有部咖啡機可以睇,呢兩樣老公同我都唔用嘅,實在可有可無。但有一樣我好鍾意,就係按摩缸隔鄰個乾衣架,次次酒店有呢樣我都會勁洗衫。




攤抖咗陣,老公話出去行吓同搵食,附近有間超市,不如睇吓物價,啲嘢普遍平過香港,特別亮眼嘅係飲品價格,包括鮮奶、汽水同酒類。


1 lit.鮮奶可以平到ARS 12,即係HKD 7蚊咁上下。


2 lit.可樂ARS 20.9,大約HKD 11




紅酒、白酒等酒類更過份,可以平到唔洗ARS 30,即係十零蚊港紙已經買到一樽酒。
不過當地超市唔多見有果汁賣,只好早餐時候飲多啲喇。

行到五點幾,趁未天黑拿拿林喺酒店附近搵間餐廳晚飯,行過見到有英文餐牌,有牛扒食,入去見到個環境都乾淨嘅,就坐低order喇!可能五點幾太早,我哋差唔多埋單先有其他客人,超正,靜靜哋!


睇吓個餐牌,係開心價!100蚊阿根廷披索大約等如55蚊港紙,我哋通常將佢除二,易計啲。


呢餐大約150蚊港紙,抵食,仲要味道唔錯,薯條係外脆內軟嘅!不過年紀大唔啱食呢啲後生仔專利嘅食物,食完即刻feel到口腔同喉嚨痛,勁熱氣

一月尾,盛夏嘅Buenos Aires夜晚八點先日落,所以早啲食晚飯的話係絕對趕得切入夜前返酒店嘅。

Day 6


朝早落酒店大堂餐廳食早餐,味道不過不失,都搵到自己鍾意食嘅嘢。

早餐後上房裝身,護照放喺酒店,無反機裝番餅鏡,再出動埋防盜腰包,老公同我都冇帶背包同袋,總之一眼睇晒乜都冇,身上淨斜孭咗一部餅鏡後好似傻瓜機嘅唔起眼相機,沿途見有啲好心人用善良嘅目光望過吓我部相機但冇提我要小心,睇嚟真係好低調,成功!


出發,地鐵一日遊,去見識吓南美巴黎嘅風采!




地鐵站舊舊哋,個別車站仲爛爛哋,不過算係比想像中乾淨,啲乘客都會買飛入閘,冇話好似巴黎啲人咁又跳又攀啲地鐵閘口。

Buenos Aires地鐵網站,只有西班牙文:http://www.buenosaires.gob.ar/subte


唔識西班牙文唔緊要,有路線圖就夠:http://www.buenosaires.gob.ar/subte/mapa

上面條linkinteractive嘅,亦有個詳細pdf版,我都係鍾意睇pdf版多啲:


Catedral站出咗之後,未認到方向住,喺附近行吓先。







定到位後向總統府Casa Rosada方向進發,總統府外有好多傳媒聚集。








Banco de la Nación Argentina,阿根廷國家銀行總部。




Monumento al General Manuel Belgrano,呢個青銅像係市內地標,刻劃將軍勇武咁手執阿根廷國旗,位置喺市中心五月廣場Plaza de Mayo之上。



同於五月廣場上嘅Pirámide de Mayo,為慶祝五月革命一周年而建。



Museo Histórico Nacional del Cabildo y la Revolución de Mayo,呢座係西班牙殖民時期嘅市議會,宜家係一座博物館。


布宜諾斯艾利斯主教座堂Catedral Metropolitana


五月廣場周邊都好光鮮企理



沿路行去七月九號大道上嘅方尖碑Obelisco都覺得治安狀況良好。






共和廣場上嘅方尖碑係為咗慶祝Buenos Aires建城四百周年而豎立嘅。




行去Palacio de Justicia de la Nación阿根廷最高法院嘅沿路風光。







阿根廷最高法院




沿Av. Córdoba行,覺得條街越行越平民化,啲人都雜咗,要提高番警覺。天氣太熱,入去家樂福嘆陣冷氣先。


Palacio de Aguas Corrientes,街道上矚目嘅建築,係一座供水站。






然後行去布誼諾斯艾利斯大學經濟科學院對面個地鐵站搭返酒店。





呢程地鐵遇到個男仔拎住個紙箱喺車廂賣筆,佢會喺每個乘客身上放低一扎筆,上面貼咗價錢嘅,唔買的話由得佢擺喺度,佢轉頭就會嚟收番。見價錢唔貴,都有幾個當地人幫襯,所以相信呢個唔係行騙技倆嚟嘅,遇到的話唔需要擔心。


未到三點已經返番酒店附近,發現有間唐人開嘅超市,老闆娘見到我哋好開心,明明同緊內地嘅家人視像都叫埋我哋入鏡,不過佢好快就發現我哋唔係同類,因為老闆娘啲普通話勁快兼勁捲脷,我哋句句都要聽兩三次先聽到 >.<



買完嘢就返酒店沖涼兼嘆冷氣。

返到酒店後就冇相喇,即係冇再出過去,應該係瞓到亂晒時間,都唔知有冇起身食嘢喇!


從來冇講過旅途中唔出街食的話會食乜,見剛啱奧地利個trip食剩咗啲麵,就影張相post吓,我哋會整香港帶去嘅麵嚟食,有時會帶埋一兩罐罐頭鮑,不過呢個南美、南極trip主要喺郵輪上面生活,已經係full board,而郵輪以外嘅日數唔多,所以呢個trip淨係帶咗少量嘅麵。圖中兩款麵係近年行李箱內必備嘅,citysuper買,左方係紫薯麵;右方係綠茶麵,就咁用滾水沖,其中紫薯麵好幼,唔洗點焗已經食得。除咗部份治安好嘅亞洲國家同澳洲我哋唔會自己帶嘢食外,其它地方都會帶定

Day 7


Casa Calma酒店間餐廳太細,我哋呢朝決定喺房入面食,之前一晚tick定有乜想食同想幾點食,早餐就會準時送到。我覺得喺房食開心啲呀,呢朝嘆咗好耐!




食飽就慢動作執吓嘢check-out,跟住拉行李轉酒店,轉去海傍嘅Hotel Emperador,Emperador呢晚包咗喺南極郵輪嘅旅費入面,所以講得上係南極郵輪嘅開始喇!


一條街直落就到Hotel Emperador,大約十分鐘步程。










大型酒店個大堂係有睇頭,同埋睇嚟間酒店翻新過,唔錯!Front desk職員話間房未ready,咁我哋寄存行李後就落function room搵郵輪公司職員,可能早啦,十二點都未夠,個場冇乜人,職員同我哋交代一下行李同航班後,我哋就出去行今日嘅行程喇。



沿路風光



Embajada de Francia法國領事館


Plazoleta Carlos Pellegrin附近啲建築好靚,係當地著名嘅高尚住宅區,呢區好靜,冇乜閒雜人,覺得好安全。



南極郵輪完咗之後,我哋會多留一日喺Buenos Aires,諗住旅程完結前見識吓南美洲大城市嘅奢華,於是book咗間貴酒店喺呢區,宜家順便行去探吓路先。唔..見到個大堂有啲失望,係睇得出有氣派嘅,不過顏色好老舊黃調,唔係咁識欣賞。呢間酒店喺當地應該等同半島酒店喺香港嘅地位咁,希望入住嘅時候會發現佢嘅好啦!



離開酒店後差唔多到今日嘅景點


Feria Artesanal Plaza Francia公園


Centro Cultural Recoleta文化中心


Basílica de Nuestra Señora del Pilar,教堂喺18世紀初建成,現為國家歷史古蹟。





好喇,跟住就~~入墳場!有啲大吉利是添,好在嗰陣仲係年廿幾,未到農曆新年!


嚟呢度無非係為咗阿根廷國母貝隆夫人Eva Perón,點解要搵佢呢?因為我對Buenos Aires甚或阿根廷嘅印象,絕大部份係由佢而嚟嘅!貝隆夫人應該要多謝Andrew Lloyd Webber,冇Webber寫出啲咁好聽嘅旋律成就Evita音樂劇,全球點會咁多人識貝隆夫人!

Evita音樂劇係改編自貝隆夫人嘅一生,講佢點樣由鄉村女孩成為阿根廷總統夫人,70年代以音樂劇形式上演,直到90年代拍成電影,我係睇完電影版後就發癲咁鍾意入面啲歌,當中最受歡迎嘅Don't Cry for me Argentina固然好聽,但更鍾意You must Love meHigh Flying, AdoredAnother suitcase in another hall,有興趣可以click入去聽,基本上成套音樂劇裡面冇邊首歌係唔好聽嘅,Webber堅勁!



墓園門口有個牌,走埋去搵搵Eva Perón嘅位置先,個個都係搵佢架喇,好快就見到Evita呢個字Bold咗,喺地圖嘅C7-88號,好似好清楚明白咁,其實入到去仍然難搵,好在迷惘嘅時候見到有tour行過,於是跟住佢哋,果然搵到貝隆夫人個墓。



睇完就返酒店攞房,行經街上有趣嘅雕塑。




酒店附近嘅商場Patio Bullrich,前身係拍賣行,已經由歷史建築改建成商場,係當地嘅upscale shopping centre



好喇,返到酒店攞得房囉,都幾企理,不過我哋喺度留幾個鐘咋,因為郵輪公司安排咗我哋搭凌晨4:15嗰班機!係4:15am





Hea咗陣,老公想出街食,於是唔俾我沖涼,話我沖完涼一定又唔願郁 >.< 之後去火車站行吓,但火車站外有班人流連,睇嚟幾雜,於是好快又返番酒店。




下晝四點半咋,食晚飯好似太早,但我哋凌晨三點幾就要起身,都係想早啲食,於是去剛才嗰個商場度搵食。有啲餐廳未開,food court冇收到,但counter冇晒人,我哋睇中咗間有英文menu嘅餐廳後叫番個職員出嚟。


睇餐牌,呢度已經係當地嘅高檔商場,仍然係開心價!




麵包、沙律、牛扒都冇乜特別,不過呢間嘅好處係唔洗侷配炸薯條,都未熱氣完。嘻嘻,食飽可以返酒店囉,yeah!



夜晚pack好行李後就將行李箱推出房門口,見到行李收咗之後就大覺瞓。凌晨將會飛去阿根廷最南端,一個有世界盡頭之稱嘅城鎮烏斯懷亞Ushuaia,夢近喇,好興奮  \(^0^)/ 


南極郵輪、阿根廷、巴西伊瓜蘇2016目錄頁

「Venus遊世界」總目錄


您可能會對以下博文感興趣:
加拿大白馬 挪威郵輪極光 格陵蘭 十二門徒國家公園
加拿大白馬2015
挪威郵輪極光2012
格陵蘭2015
澳洲墨爾本2012


17 則留言:

  1. 單睇你們拍的照片,BA個市容都幾靚幾井井有條,唔似係要開動戒備mode喎^^
    物價真係平過hk,定還是依家hk真係貴得過份咗呢?

    回覆刪除
    回覆
    1. 旅遊區同高尚區個市容係唔錯呀, 呢啲區嘅治安都感覺良好, 不過行行吓都有經過殘啲嘅地方, 個地爛爛哋, 啲舖吉咗, 牆上有塗鴉嗰啲, 不過冇影到, 只係想盡快離開, 所以呢個咁似樣嘅市容係事實, 不過唔係事實嘅全部 ^.*
      唔......印象中冇嘢覺得貴, 應該都平過香港喇! 香港啲物價係愈嚟愈過份呀, 啲高消費品我已經唔會喺香港買

      刪除
  2. 嘩! 一次過寫晒幾日⋯
    咦?係喎,下次遇到按摩浴缸都試吓洗衫先,wakaka~~~

    回覆刪除
    回覆
    1. 係呀, 心急上郵輪呀, 本來寫寫吓覺得長得滯想分開兩篇, 又唔知點分好喎, 都係一篇過喇 ^^
      玩嘢呀細路 ;p 不過笑咗! 反正唔用, 費事搞個按摩缸, 咁執房嗰個唔洗咁辛苦

      刪除
  3. 我開頭都幾驚ba會好雜...但親身經歷過後又還可以~我覺得好過巴黎好多喎~~
    華!!會包係一晚酒店架!!咁幾好喎!!!!!!雖然間房睇落舊並地!!
    唔知點解我覺得你份早餐係房食好似吸引d咁既~~雖然係同一樣既野~
    好緊張呀~~去烏斯懷亞喇~~其實我幾鐘意哥度~

    回覆刪除
    回覆
    1. 係呀, 完成咗地鐵一日遊之後, 老公已經叫我裝番支天涯鏡帶出街, 我就梗係堅持穩陣啲啦, 反正大城市唔會有驚為天人嘅嘢影。治安好壞有高含量嘅個人彩數成份, 有時都好難衡量, 但BA感覺係比傳聞好 ^^
      其實我唔想郵輪公司包機票酒店, 咁可以彈性啲, 可以勉強夠時間去埋莫雷諾, 問咗郵輪公司話可以自己放棄酒店機票, 但冇得減費用, 其實我哋都1516, 諗住飛得咁遠都想去埋, 點知個天又幫我做咗決定。el calafate應該有得直飛烏斯懷亞架嘛, 但上船前嗰日剩番要轉機嘅, 要喺el calafate飛番上首都再飛落烏斯懷亞, 由個幾鐘變成10幾個鐘, 咁梗係唔制啦, 而且都唔夠時間, 於是先乖乖哋跟番郵輪公司個行程。
      係呀, 係正好多, 坐喺床食, 好嘆!
      我都係, 有極地feel, 仲覺得同南極好近咁 :)

      刪除
    2. 個乾毛巾架唔乾得多多件衫喎。最好就係有乾衣機喇。不過就唔會在酒店房內有此設備。

      刪除
    3. 係呀, 要分批乾, 好在唔算多嘢洗

      刪除
    4. 好一句高含量既個人彩數成份~~我大笑左~都係既~有時真係睇彩數~
      咁如果無得退錢梗係要埋機票酒店啦!!!!!!不過莫雷諾真係好靚..係我見過既冰川之中我最鐘意同埋最靚既!!有呀~我地都係calafate直飛去烏斯懷亞架~~
      係呀...我真係好鐘意哥度~~~~哥度近碼頭仲有間懷舊cafe~好正~~~同埋鐘意哥度可能都同春光乍洩套戲有少少關係~因為哥時想去睇世界盡頭既燈塔~

      刪除
    5. 小t, 妳好殘忍呀, 仲引我 >.<
      套戲我已經冇乜印象囉, 純粹鍾意嗰種極地感覺 ^^

      刪除
  4. 我睇完妳個post,開頭嗰間酒店按摩浴缸我都未必用,咖啡機一定用呀,我發覺洗手盆同水龍頭高度相距咁高嘅,我都覺早餐簡單但好正,而旅行我從未帶過杯麵、即食麵之類架,我點都盡量試下當地食品,阿根廷又覺治安差,反而巴西先大鑊,我認得貝隆夫人墓,因為李天縱介紹過。
    睇咗回應小t post,我明白點解郵輪公司包一晚酒店。

    回覆刪除
    回覆
    1. 噢, 覆漏咗路霸兄添, 拿拿林覆番, 剛發現個留言跌咗落垃圾筒 >.<
      因為我飲親咖啡都會頭暈, 老公就近年戒咗飲, 所以咪唔用囉, 我估呢兩個設備多人鍾意, 所以順便提吓。
      咦, 唔講唔覺, 不過咁好喎, 方便入水落水煲 ^^
      嘩, 帶麵呢樣嘢有好多原因呀, 但一定要帶, 會安心好多。一來係治安啦, 喺外地會盡量天黑前返酒店, 但尤其係自駕呢, 交通情況好難預, 如果去到已經天黑或知道食完嘢天會黑齊, 就一定唔出去搵食喇! 其二係住處附近未必有食肆又或者一早收咗。第三個原因係唔想餐餐出去食, 太膩喇! 嘻嘻, 仲有一個原因, 就係懶! 完咗行程就唔想郁, 通常係俾身邊嗰個迫出去架咋 >.< 所以帶麵好緊要, 唔洗侷住不論咩環境或者咩狀態/心情都要出去搵食。
      巴西真大鑊, 到奧運都搞唔掂啲治安!
      有睇李天縱個旅遊特輯, 不過冇集集追, 搵佢介紹好啱呀, 當地華人識西班牙文, 攞料都易啲!

      刪除
  5. 酒店的外觀很不錯,值得試!
    市內好有西班牙 feel!

    回覆刪除
    回覆
    1. 呢間係唔錯呀 ^^
      係呀, 風格似呀, 前西班牙殖民地嘛 :)

      刪除
  6. Evita我都好鍾意, 入面D歌好好聽. 睇來阿根廷D治安唔錯, 仲好似好過法國. 4:15AM咁早機其實都幾辛苦, 其實你呢個TRIP飛左幾多程機?

    回覆刪除
    回覆
    1. 係呀, 好過法國! 法國嗰啲係有組織架, 不過好在以偷為主, 搶只係好少數。
      宜家睇里約奧運啲新聞呢, 真係好慶幸冇過去, 因為唔想留喺BA咁多日, 有諗過過里約架, 好在上網睇完後打退堂鼓。佢真係到奧運都未搞掂啲治安, 搶都不特止, 仲出埋槍, 呢啲地方真係不宜旅遊!
      辛苦呀, 就算心情興奮都掩蓋唔到辛苦嘅感覺
      咦, 冇計過喎, 但以玩南美嚟講, 我算係少, 因為南美好多大景點都冇去到
      國際航班就 HKG<->AMS<->EZE
      內陸就 AEP <-> IGR 同埋 AEP<->USH

      刪除