2016年11月14日 星期一

Day 14 南極第五站──Neko Harbour、Damoy Point


**南美、南極篇使用粵語


接近一個月冇發文喇,有冇掛住我呢 ^.*


返工真係好忙好攰呀,上星期喺台北返嚟後仲病咗,有幾晚半夜咳醒,宜家都仲未好晒。呢期轉天氣,大家都要保重身體呀!話時話呢,幾忙都或多或少有時間空閒嘅,係睇你想唔想push吓自己去做架啫,好似宜家感冒未清咪又係出到blog,因為呢,我發覺自己好需要、好需要,極度需要搵啲靚景嚟平衡吓自己,洗滌吓身心嘅疲累。


呢日啲景靚得好誇張,啲相大部份喺南極半島上嘅Neko Harbour影嘅。



吖,blog入面出唔到嘅相呢,已經好肯定要重新link up,放喺google drive啲相宜家應該冇得公開share,所以成批相出唔到,咁2012年之前啲舊相都會爛晒,我早幾日link up番幾張跟住就冇心機再整喇,遲啲再算。唉,已經冇時間,google仲搞埋啲咁嘢!



續遊記,郵輪繼續沿南極半島南下。


早餐後喺甲板影唔停,雖然天色麻麻,但景物係越嚟越世外桃源。










郵輪anchorNeko Harbour,除咗其中一方係海,其餘三面都係雄偉嘅雪山同冰川,好愛、好愛呢個咁靚嘅世界!


























望吓遠方我哋架郵輪放出去嘅小艇細到好似一隻蚊咁,相信更加能夠感受到置身現場嘅嗰種氣勢,見以下四張相。





形態優美嘅浮冰散落海面、清晰嘅倒影、偶爾飄過嘅一絲雲霧,壯麗嘅冰川,仲有世界上最清新嘅空氣,實在好掛住南極 >.<
















終於到我哋登岸喇!



留意上圖右方,見到幾條Penguin highways嘛?









呢個南極trip見到最多嘅就係Gentoo,企鵝嘅柔軟體操真利害,要點摺就點摺 ^^




嘩,捕咗咁耐,終於有eye contact喇,被電暈,好可愛!


有隻Seal喺沙灘上瞓覺。



喺灘度影吓企鵝,影吓冰川




































沿路繼續上就係一個終年積雪嘅雪坡,可以一路行上頂,但部份積雪都幾厚,有一吓跟唔到之前郵輪朋友啲腳印,隻腳落咗啲冇人踩過嘅雪度,雪深竟然到膝頭,即刻trap住咗個人仲坐埋落雪地,好在嗰笪冇企鵝便便啫,於是索性坐喺雪度回一回神抽番隻腳出嚟先!



之後步步為營,慢慢行跟番啲腳印,雖然越上得高越見到啲腳印位係有深度嘅,但至少睇到有幾深。












跟住聽到巨響,呢個冰川係比較容易崩塌嘅,之前嗰晚個行程簡介會有叫大家留意,希望影到崩塌嘅一刻。但當然啦,點知佢幾時塌同塌邊忽,都係聽到聲先識搵嚟影啦,已經塌晒落海lu,見下兩圖。



雪越落越大,其實開心可以再次感受南極嘅夏雪,啲景物特別淒美,不過就搞到意志力驟降,唔想繼續行上去,於是老公就自己一個繼續行上山。





老公話佢上到山頂就算喇,冇好似部份郵輪朋友咁一路行過去另一個山頭。



上兩圖見唔見呀,主路側邊啲腳印係有深度架,有啲都幾深吓添,但條主路俾之前啲郵輪朋友行到平滑晒,好跣吓,真係每步都要諗個落腳點。


落返嚟喇,超斜!上還好,最多都係插得深個人坐落雪地啫,落係仲難,好驚會一路跣落沙灘!






終於落返近沙灘處喇,雖然呢個雪坡唔易行,但呢日個環境真係超靚超鍾意,都係怪自己體能同意志力唔夠,未能夠好似有啲郵輪朋友咁行去另一個山頭。


跟住影多陣企鵝就搭小艇上返郵輪食午飯。






































午飯後不定時出甲板再影吓











黃昏到下一個登岸點Damoy Point,唔少郵輪朋友見落緊雪都選擇唔登岸,我哋就覺得去到冇理由唔land,於是決定搭小艇出去睇咗現場咩環境再決定行唔行。


坐小艇出發時影嘅,六角型雪花,好靚!

呢個登岸安排係今個船程嘅另一個投訴位,又係行到邊都聽到全船鬧爆嗰種,呢個登岸點堅係高難度,成個Damoy Point可唔可以搵個易行啲嘅地方嚟俾小艇埋岸先,冇理由揀喺啲咁崎嶇、咁怪石嶙峋嘅地點嚟land




事緣隻小艇個埋岸位唔係沙灘淺灘嗰類,而係需要半攀爬咁爬上啲凹凸不平嘅石度,啲石唔少有企鵝便便,係跣嘅,加上落雪令到啲石更跣,可以喺相度睇到啲石有幾難行。







小艇上有一位外國女士見到咁嘅情況決定唔落,原小艇返郵輪,我哋就決定上岸影幾張相就走,其實呢度有嘢行架,岸上有間hut,不過真係行幾步已經覺得好困難,為免跌親都係上返小艇離開喇!





晚飯後出甲板影相,天色麻麻,翌日打算land Port LockroyBase Brown,待續。

南極郵輪、阿根廷、巴西伊瓜蘇2016目錄頁

「Venus遊世界」總目錄


您可能會對以下博文感興趣:
紐約 大加納利島 wanaka 極光
購物及藝術在紐約
大加納利島
新西蘭南島
格陵蘭海上極光

Copyright © 2016 by Venus. All rights reserved.

21 則留言:

  1. 長命工功長命做,都係身體最緊要.....
    不過我都好同意睇下啲靚景相係會開心啲,心情唔同晒^^
    企鵝仔好可愛,有eye contact仲正

    回覆刪除
    回覆
    1. 多謝基爾支持, 好驚喜, 咁快有留言 ^0^ 同意同意, 身體最緊要!
      係呀, 精神上好攰嘅時候堅有用
      企鵝仔經常無視我哋, 好難捕捉到目光交接嘅一刻

      刪除
    2. 多謝基爾, 好開心我咁懶發文你哋都仲記得我, 咁我要勤力啲!

      刪除
    3. 我都祝你新年快樂, 事事順意 ^.*

      刪除
  2. 身體無乜嘢嘛!唔怪之得咁耐無上blog喇
    有好多時轉季喺咁呀,咳好難好架...,我太太咳咗成個月,食乜藥都無用,轉番天氣...好咗!
    香港工作都喺好忙,去下旅行鬆下,
    冰天雪地,真喺睇到都凍,好好多企鵝仔,好可愛,
    但南極有好多天敵。

    回覆刪除
    回覆
    1. 轉季容易病, 大家都保重
      係呀, 呢度好多企鵝, 但當時都落幾大雪, 見到有啲企鵝b凍到震, 好想執起佢哋嚟攬 >.<

      刪除
  3. 梗係有啦!!!!我掛左你好耐喇!!!!
    你要保重身體呀!!!!!!
    我好羨慕你去過南極親眼睇過南極既企鵝~~~~~~~
    同埋我勁鐘意d雪係個海度好密..好似一塊塊頭皮咁既畫面~好靚~
    攰就抖下啦~不過我仍在等你blog~

    回覆刪除
    回覆
    1. 多謝掛念, 錫晒, 唔睇由自可, 睇到真係唔好意思添, 可以荒廢個blog咁耐唔理 >.<
      新一年我要勤力啲寫blog!!!!!!!!!! 我已經充滿力量喇!!!!!!!!!!
      只要妳想去, 好快都會去到, 但我下次去就一定係退休後, 南極船期嗰段日子都唔會有足夠假期
      頭皮?! 笑c我! 講落又有啲似, 我都好鍾意呢個畫面 ^^

      刪除
  4. 要保重身體,呢排都好多人病呢! 冰川相真係好震撼人心,天氣唔太好都影得咁靚. Damoy point簡直係石灘啦! 落住雪仲要係石灌land真係幾危險, 好彩大家冇事.

    回覆刪除
    回覆
    1. 多謝關心, 大家都要保重, 天氣到宜家都時凍時熱!
      係呀, 超危險, 見到有船友跌親, 諗住旅程仲有一半, 都要錫吓身, 整親的話, 餘下嘅旅程唔知點算!

      刪除
  5. 原來唔思服,唔怪之無蒲頭啦~ 保重呀~
    落雪呀~ 係南極遇上落雪,好正嘅感覺。

    回覆刪除
    回覆
    1. 多謝關心, 唔思服+懶啦
      落雪個感覺本身已經正, 仲要係夏天落雪, 夠晒特別!

      刪除
  6. 祝妳和家人..冬至團圓快樂!

    回覆刪除
    回覆
    1. 多謝路霸兄仲記得我, 雖然係遲來的祝福, 都要講番晒冬至、聖誕、新年快樂 ^.*

      刪除
  7. 回覆
    1. 多謝jane, merry christmas & happy new year \(^0^)/

      刪除
  8. 回覆
    1. 多謝long bell, 新年快樂呀 \(^0^)/

      刪除
  9. Happy New Year! 🎉🎉
    唔好偷懶!

    回覆刪除
    回覆
    1. 多謝銀生, 新年快樂呀!
      好, 應承你唔偷懶, 嚟緊仲有農曆年假期, 應該呢排都可以勤力番啲寫blog ^.*

      刪除