2017年2月28日 星期二

Day 16南極第七站──走進南極圈


**南美、南極篇使用粵語


上篇先自讚,今次就兩個幾星期先發文 >.< 其實我有掛住大家,亦都好想出blog架,每晚都會揀相。但寫blog始終係興趣,唔想強迫自己邊日一定要出到,只可以話我有心儘可能兩星期內發文啦!


今篇好值得、好值得記,係夢嘅實現,郵輪終於入咗南極圈(南緯6633分)喇!雖然呢個旅程最南只係去到南緯6652分嘅Detaille Island,以保證入到南極圈嘅航線嚟講,呢個緯度絕對係強差人意,因為只係僅僅入咗極圈,不過呢程船揀咗行少郵輪去嘅Weddell Sea海域,而嗰種breathtaking view係絕對彌補到緯度上嘅不足。始終船程係得咁多日,行咗過Weddell Sea嗰邊就自然唔夠時間落南啲喇。


續遊記,郵輪上嘅生活大體上都係大早起身食早餐,然後上甲板影相,呢日都唔例外。



















係冰嘅世界,大自然嘅藝術,好靚好靚!


































一路見到愈嚟愈多海豹,其中Crabeater SealsWeddell SealsLeopard Seals都係經常喺廣播度聽到expedition team leader講嘅。


Crabeater Seal係當中我覺得比較靚嘅。





呢隻係Leopard seal,肚位灰色,仲有好多點點。

喺甲板影咗一排就聽到廣播叫啲乘客上甲板,因為郵輪差唔多進入南極圈喇,甲板度擺定咗啲越過南極圈後使用嘅慶祝物品。





















靠近南極圈嘅景物




















南緯6633分喇,郵輪正式進入南極圈,yeah \(^0^)/ 見下數圖。




攝錄到郵輪過南極圈時響起嘅嗰三吓汽笛聲,不過拍緊短片嘅相機愈拎愈斜,水準奇差,唔想post晒全段,於是cut咗冇咁斜嗰第一響汽笛喺facebook專頁度,大家可以一齊經歷過南極圈嘅一刻。


過南極圈後有慶祝活動,我見到咁多人梗係有咁遠閃咁遠啦,最怕人多嘈雜架喇,所以呢兩張咁熱鬧嘅慶祝活動照就要多謝老公嘅拍攝喇!

嘩,好誇張,唔係一兩隻或者幾隻喇,係一大堆海豹!


























瞓喺近鏡頭嗰隻黑色,肚有白點嘅海豹就係Weddell Seal喇。

影多一陣冰同海豹就去餐廳食lunch,然後上甲板再影過。





















Detaille Island喇,郵輪喺對開海面anchor



Detaille Island係今個船程裡面唯一會踏足嘅南極圈內土地。



坐快艇出發喇

上岸位被冰封,expedition team members鏟咗條冰路出嚟方便上落,不過條路好跣吓,真係步步為營。


Detaille Island位於66°52 S 66°48W,島上有個50年代興建嘅英國基地,叫Station W,用嚟做surveyinggeologymeteorology嘅,不過呢度易受海冰堵塞,好多時都未必登到岸或者未必做到補給,於是用咗幾年就轉去Horseshoe Island做研究喇。







島上環境,去圖。




















啲雪好深

今個旅程中唯一一個南極圈內嘅登岸點,一定要亮吓相。

差唔多走嘅時候天氣差咗,仲落起雪嚟。




等快艇上番郵輪嘅時候,影影對岸嘅冰,可以見到冰層好厚。


上郵輪換番衫後,又走上甲板睇有冇嘢影,呢陣個天灰晒,繼續落雪,都冇乜影喇,返房休息吓就去聽講座,聽完就去餐廳食晚飯。



郵輪晚上向北航行,意味住踏上回航嘅旅程喇,唔捨得!

再夜啲夾咗張證書喺門口,以為係入南極圈嘅證書添,原來未係,入南極圈嗰張要遲啲先收到。


晚上十點喺七樓休息室有show睇,我就唔願郁喇,夜晚都係鍾意靜靜哋。


下篇踏上回程之路,擬land兩個登岸點,待續



南極郵輪、阿根廷、巴西伊瓜蘇2016目錄頁


「Venus遊世界」總目錄


您可能會對以下博文感興趣:
加拿大白馬 傑古沙龍湖 北極熊 奧克蘭
加拿大白馬2015
冰島南部2013
格陵蘭海上看北極熊2015
新西蘭奧克蘭2014

Copyright © 2017 by Venus. All rights reserved.

10 則留言:

  1. 氣溫0度好似都唔算太凍
    研究站的屋內原來仲有床褥被鋪同埋好多生活用品留下來喎

    回覆刪除
    回覆
    1. 係呀, 始終係夏天, 所以溫度唔會太低。
      不過有時喺甲板食風食得多, 都咪話唔寒, 要入船艙匿陣暖吓身再出去影過
      係囉, 棄用咗個站就乜都唔執走, 連通訊設備都有

      刪除
  2. 我都好掛住你呀~你一定係依家番工好多野做喇...慘慘...休息多d*3*
    好感動呀!!!!如果我聽到哥3下笛聲我真係會想喊!!!
    呢個都係我其一想實現既夢想~但....暫時仲未實現到..哭哭

    回覆刪除
    回覆
    1. 小t, 我掛住妳又掛住冰島呀, 快啲寫, 瞓少啲都會追睇!
      多呀, 放工就虛脫咁, 知道, 會休息行先, 多謝關心, 錫晒!
      我知妳一定會做到

      刪除
    2. 傻豬~得閒先睇啦~我知你忙~你得閒黎探我已經好開心~*3*
      睇到你咁忙....我就認為你之前放既哥一年假你必要的~
      好彩你之前玩得咁開心~為你之後既工作儲定能量~
      加油~~支持你~~~*3*

      刪除
    3. 多謝小t, 妳幾時都咁sweet同咁warm, 錫晒!

      刪除
  3. 冰海世界真係睇極都唔厭, 好靚!! 咁張南極圈Certificate唔係入南極圈時派? 佢地咁特別既?! 有一次我剛飛過赤度跟住落機,飛過左就即派張certificate比我地.

    回覆刪除
    回覆
    1. 完全同意, 唔厭唔厭, 日日睇都唔厭!
      好有效率喎! 遲咗一日派, 我覺得都ok嘅, 有得派就得喇, 因為好有紀念性。始終北極圈內有好多國家, 可以常去, 但南極圈就唔易入, 就算去南極洲都未必入南極圈

      刪除
  4. 見啲人放棄咗研究站,但棄置不少垃圾廢物,污染環境!!

    回覆刪除
    回覆
    1. 近年轉咗做Historic Site, 所以保留番當年嘅樣卦! 我覺得根本係之前冇清到, 所以不如轉做Historic Site囉 >.<

      刪除