2016年7月14日 星期四

Day 1-2 挑戰極限之超級長途機(HKG-AMS-EZE+AEP-IGR)


**南美、南極篇將全部使用粵語

難忘嘅旅程,想用番自己最熟悉嘅dialect



南美、南極之旅出發!因為揀咗KLM(荷蘭皇家航空),所以經阿姆斯特丹轉機。

話說買機票有段小插曲,順便記一記,要感謝上天最好嘅安排!而大家買南美機票時不妨停一停、等一等,原來係可以有僅過萬嘅低價。

當日搵飛EZE(阿根廷布宜諾斯艾利斯國際機場)機票時,發現under 30個鐘機程嘅選擇只有KLMAA(美國航空),原本屬意AA多啲,反正攞咗美國簽證,又可以儲埋Asia Miles。點知夾埋南極船期後發覺嗰附近嘅日子KLM反而平啲,觀察咗兩個星期見價格冇乜變動就卜鎚買咗KLM,不過所謂平啲,已經係我買過最貴嘅econ,接近HKD17000 per head。或者買咗就唔應該手痕又走去quote價,冇耐竟然發現AA大劈價,連稅HKD12000咋,日子夾到船期,冇諗過買機票都咁大風險囉,兩張機票轉頭就蝕咗成萬蚊 >.<

見到張咁抵嘅機票好想買,於是打去KLM度仔細問退換條款,最後因為費事煩,太多uncertainties唔知點改好,驚限期內改唔到嘥埋仲衰,所以決定搭番KLM算喇!一直到上船同班郵輪朋友傾開先知我哋今次搭KLM絕對係好事,佢哋話有朋友喺Dallas嗰邊(即AA張機票嘅轉機地點)受大風雪影響飛唔到去第二度玩,話如果我哋搭AA的話可能趕唔切上船添。聽完即刻覺得好欣慰,雖然我哋上船前有幾日去伊瓜蘇,算係有幾日buffer,未必趕唔切上船嘅,但都唔想損失行程同影響心情嘛,所以好感謝上天嘅眷顧同安排,令南極之行順利完成!


印象中荷航幾受外國人歡迎,次次客滿,但啲位偏窄,飛機餐都係一般,不過服務幾好,員工有笑容。要留意荷航係俾法航吞併咗嘅,法航出名服務差,若非留法國,買飛時避免揀法航。




完成一半機程,熬咗十幾個鐘到Amsterdam喇,喺lounge等個幾鐘再飛阿根廷。


又十幾個鐘喇,首次踏足南美洲嘅土地!根據票據寫嘅飛行時間,由香港到Buenos Aires連同接近兩個鐘嘅轉機等候時間,需時28小時20分鐘,呢片土地真係遠得交關!阿根廷同香港有11個鐘嘅時差,比香港慢11小時。


抵步係朝早七點幾,首要任務係去市內嘅酒店放低一件行李先。機場禁區有好多間出租車公司櫃位,我哋初到貴境最擔心安全,所以唔格價喇,記得網上資料話Tienda Leon口碑好,於是就直接幫襯呢間。

兩位ARS340,信用咭付款。一直有傳南美好興盜用信用卡,但我哋唔想keep同換咁多南美貨幣,所以喺啲應該可信嘅機構照用信用卡。


買咗飛之後,個櫃位職員同我哋講間酒店要轉車先到,我哋原本搭機搭到溫溫燉燉咁,聽到要轉車即刻醒晒!吓,唔係直接到酒店架咩?於是問佢我哋要喺邊個站落車轉、去邊度轉、點認到架車之類,個職員只識少少英文,大概講到喺原位等,於是我哋帶住一頭問號咁行去Terminal 3搵車。

上車坐司機附近,叫佢提我哋落車轉車,好在佢都係話原位等,咁我諗ok卦!


去到個似係總站,又似係Tienda Leon公司嘅地方,落車後有個職員會過嚟問目的地,然後分別安排唔同嘅車。


之後竟然變咗部私家van嘅物體將我哋送到酒店門口。果然又係擔心太多,幾順利喎!

跟住要讚吓Casa Calma Hotel,因為我哋下晝就要飛伊瓜蘇住三晚,行程嘅第四、五晚先番嚟呢間酒店住。而間航空公司Aerolineas只接受15kg行李重量,於是我哋打算只帶個細行李箱飛伊瓜蘇,個大嘅就寄存喺酒店。呢間酒店超級好,連自己都覺得要求有啲過份,但對方第一次email回覆時已經話存放喺酒店冇問題,非常感謝Casa Calma肯行個方便,否則我哋要罰行李超重或者要另外搵地方存放喇!










放好行李後仲有幾個鐘先上機,於是喺酒店附近行吓,可能早,街上唔係咁多人,唔覺得危險,啲景點喺伊瓜蘇番嚟後會再行,到時先介紹。





然後去咗個大商場唱錢


阿根廷披索


時間差唔多就請酒店職員幫手叫架車去內陸機場AEP,呢個機場好近市區嘅。
我哋從來都係穩陣派,雖然酒店職員叫車時已經同咗司機講我哋會去內陸機場而非國際機場,但我哋上車後仍然嘗試同司機再confirm一次,但好明顯係溝通唔到,又驚唔知車咗去邊喎,於是樣衰衰叫番酒店職員幫口再講一次,好似唔信人咁添,好在酒店職員個樣好樂意咁!呢間酒店幾個職員啲英文都好流利,之後伊瓜蘇間國際集團酒店都做唔到咁,只有個別員工講得好,所以我好推介Casa Calma。



寄行李後喺機場附近行吓。








禁區內







飛伊瓜蘇Iguazu喇,機程唔洗兩個鐘。





鳥瞰Buenos Aires,原來地球嘅另一邊係咁樣嘅!







到伊瓜蘇瀑布附近響起廣播,機長為我哋現場介紹瀑布,仲話會讓我哋坐邊個位置都可以睇到,叫乘客安坐喺位上面就得喇。機長來來回回兜咗幾轉,我直情覺得自己坐緊觀光飛機,超開心呀,發癲咁影!老公就話驚咁兜法危險喎,er..會唔會諗多咗?!









冇諗到機長會兜咁耐,所以只係用手機影咋,早知拎大機出嚟啦!架機係Aerolineas屬下嘅Austral,但就唔知係呢個機長好定係呢條航線架架機都會咁做喇!



去到伊瓜蘇,攞完行李又要搵車去酒店喇,今次記得影張飛,每位ARS90(大約HKD50),由個司機依據乘客嘅目的地規劃路線,我哋去Mercure Iguazu Hotel Iru,好快就落車。








Mercure Iguazu Hotel Iru係新酒店,modern、衛生情況好好,滿意!去圖。


















酒店啲相好多都唔係到埗當日影嘅,因為個人已經攰到傻,由喺香港出發到嚟到伊瓜蘇嘅酒店,我哋已經有超過40個鐘冇認真瞓過。


好想沖涼瞓覺,食唔食嘢都冇所謂,不過醒起要睇吓啲去睇瀑布嘅團,於是問酒店職員攞啲資料後就喺酒店餐廳食tea順便睇埋。




tea有被欺騙感覺,酒店喎,本小姐冇見過咁樣衰嘅tea set for 2囉!其實係咪香港太好,搞到我期望過高呢?!不過事實係有啲貨不對辦,menu寫有croissants,我哋睇極都唔見有,問個侍應話賣晒,唔知補咗邊樣喎!唉,算啦,求其食完上番房沖涼瞓覺喇!間酒店我係好滿意嘅,不過tea就..

Day 3會去阿根廷呢邊嘅伊瓜蘇,待續

南極郵輪、阿根廷、巴西伊瓜蘇2016目錄頁


「Venus遊世界」總目錄


您可能會對以下博文感興趣:
墨爾本酒莊 溫哥華酒店 紐約中央公園 台北林口三井
墨爾本酒莊及農場
溫哥華酒店
紐約中央公園
台北林口三井outlet


Copyright © 2016 by Venus. All rights reserved.

32 則留言:

  1. 頭兩天個行程好順利,係一個好既開始。另外,班機咁正,在景點上空兜幾個圈,超讚呀!

    回覆刪除
    回覆
    1. 係呀, 唔洗損失行程真好!
      班機真係超正呀, 好想多謝個機師, 兜咗好多轉, 乜角度都睇晒 ^0^

      刪除
  2. 頭兩天個行程好順利,係一個好既開始。另外,班機咁正,在景點上空兜幾個圈,超讚呀!

    回覆刪除
  3. 個機長好好啊~由空中睇個瀑布都好清楚好宏偉呀!

    回覆刪除
    回覆
    1. 係呀, 佢超好呀, 冇預會咁樣兜法, 直情喜出望外!
      如果攞大機嗰啲, 應該可以影得好靚!

      刪除
  4. 最初我都覺得你好勁坐成40個鐘機程冇jet lag去到伊瓜蘇仲咁好精神四圍去影間酒店啲泳池gym room真係好好精力喎^^
    其實如果經南非會唔會近啲?純粹地理上感覺.....
    好正呀飛伊瓜蘇果程機,可以同場加映空中遊瀑布@@

    回覆刪除
    回覆
    1. 唔係講笑, 上房照鏡嗰吓, 個樣殘到自己都驚, 呵呵! 好處係以後飛歐洲嗰十零個鐘絕對濕濕碎; 壞處係真心驚南美機程, 唔知仲有冇勇氣再去南美喇 ^.^"
      如果飛南美其它國家, 可以用澳航經澳洲去, 感覺上近啲。南非又真係冇諗過喎, 唔知呢
      係呀, 超正 \(^0^)/

      刪除
    2. 我,好似係book 唔到機票,當年都係經歐洲過去。澳洲同南非差唔多,唔記得飛邊快D

      刪除
  5. 乜都唔使講...妳揀荷航喺正確過正確選擇,美國航空出名誤點多...服務差,家弟去美國出差多個城市,一個星期內竟然誤點共達48個鐘,最後飛北京一程,話機件問題要遲咗24小時,三百幾名乘客無酒店安排,死得喇!

    回覆刪除
    回覆
    1. 航空安全同準時應該係兩個最重要嘅條件, 誤點會搞到乜都亂晒
      嘩, 連安排都咁差, 好離譜吓喎!!

      刪除
  6. 我睇緊好友小t個南美post,
    要30幾個鐘真喺好耐,
    去咗阿根延伊瓜蘇瀑布,可以喺飛機下望都覺得好震撼,
    我只睇過TVB的南美之旅李天縱介紹過,好靚..
    當然睇妳post詳細啲喇

    回覆刪除
    回覆
    1. 我都有睇呀 ^^
      係呀, 自己仲要安排到即日喺布宜諾斯飛埋上伊瓜蘇, 真係好癲 >.<
      南美真係好遠, 機程超辛苦, 今次係為咗南極咋。試過一次後覺得, 既然飛到咁遠, 應該一鋪過去晒所有南美啲大景點, 就我嚟講, 我坐完呢次之後係真心驚, 落機嗰吓覺得自己變咗一條人乾 ^^"
      多謝支持!

      刪除
  7. 要去南美玩,真的要多參考。
    揀荷航似乎穩陣好多。

    回覆刪除
    回覆
    1. 南美治安嘅聲名比較差, 所以事前做多啲準備
      今次揀咗荷航真係冇錯, 好smooth, 好準時, 唔洗擔心 ^^

      刪除
  8. 世事都是自有安排,隨緣便心安理得!^^

    回覆刪除
    回覆
    1. 係呀, 知道 ^.*
      呢種諗法好似去到另一個層次咁 ^^

      刪除
  9. 去南美要等唔做,去耐D。
    機師好好呀!
    個tea 擺明啱遊客

    回覆刪除
    回覆
    1. 飛到咁遠, 係應該要玩耐啲呀!
      超好, 直情想表揚吓佢, 呵呵
      係啦, 被呃了, 有強烈感覺係將啲賣唔晒嘅放晒落碟俾我哋囉 >.<

      刪除
  10. 啩! 個機長簡直係超好人,可以兜圈叫乘客安坐睇瀑布. 個tea set真係好唔掂, 係咪佢地d standard似茶記, 已經叫做好好呢??

    回覆刪除
    回覆
    1. 咪囉咪囉, 無啦啦變咗空中暢遊睇瀑布, 呢程機真係抵到爛!
      >.< 我都想知佢哋啲standard係咪咁, 但晚餐碟碟超大堆頭架喎! 唯有自我安慰, 個侍應知我哋搭機攰到冇心機食, 所以費事浪費食物囉 >.<

      刪除
  11. Venus, 我返嚟後睇你遊記攪到好亂,你唔係無幾耐之前已去過南美南極咩? 乜又話第一次嘅???
    荷航?我上次南美回程遇上極品空姐,全程發爛

    回覆刪除
    回覆
    1. 嘻嘻, 你呢期咁忙邊有心記呢? ^.* 南美係第一次同到宜家為止嘅唯一一次, 我宜家先寫番今年初1月至2月嘅南美南極之嘛
      嘩, 個空姐咩事?! 近年搭過兩次荷航, 啲空姐空少都有笑容, 同埋我搭親機都瞓唔著架嘛, 見佢哋成日攞水攞飲品巡嚟巡去, 我覺得服務幾好喎

      刪除
    2. 冤枉呀! 因為你咁嘅卜友成日講南北極,我依家終於記得你之前講郵輪係講北極,而唔係南極,係你攪亂我,哈哈~
      果次嘅事都不太好受,睇我南美遊記最後一篇"空姐你好野"啦⋯

      刪除
    3. 咁都得?! 好啦好啦, 係我唔啱! 呵呵
      好, 即睇!

      刪除
  12. Such a long flight. The view of the fall from the flight is magnificent.

    回覆刪除
    回覆
    1. 係好救命 >.< 所以宜家有朋友問親我有關南美嘅嘢, 我第一句就建議最好一次玩晒啲大景點, 真係驚咗咁長途嘅機程, 我今次去唔晒好後悔, 要等啲恐懼消減啲先敢再諗
      係呀, 超靚, 近睇都靚, 另一種味道 :)

      刪除
  13. 好開心呀~~~~又可以睇你寫blog喇~~~~~
    我懷疑由阿根廷經地核可能直通港澳...其實呢個方法先係最近~~~~~~~~~~~~~~~~~~~~~~~~~~~~
    華...咁你真係好彩喇無搭AA.....我買左機票之後先發覺...佢地機場d check in counter成日都有問題....搞到我哥時都擔心左好耐呀....但我哥時無特價...由香港飛美國再飛利馬再飛庫斯科.....走時阿根廷經美國番香港.....成條機票先12000.....無得輸啦....價錢真係吸引過荷航好多~~我哥時都有睇...不過佢d轉機時間麻麻....
    華....你兩個好強人呀......仲即日飛去伊瓜蘇...
    我好羨慕你哥程機個機長超好人...我帶望我第日去哥時都會係咁~~~~

    回覆刪除
    回覆
    1. 多謝捧場, 下一篇揀相叫緊救命! 超爆多相, 要戒喪影, 真係要戒!
      呢個就係可愛小t, 我鍾意呀! 搵次約埋一齊搵地核通道!!
      吓, 個check in counter做乜呀? 唔準時開?!
      嘩嘩嘩嘩嘩, 去程飛咁多程都係12000?! 可能我遲買, 成個trip都好遲先決定。我quote嗰陣AA經dallas來回香港, 未特價係過二萬架, 至於係二萬幾就唔記得喇, 但係見二萬都唔諗啦, 痴晒線, econ咋喎! 所以之後quote到12000真係唔信自己對眼, 最慘係等咗兩星期都唔減, 買完冇耐就嚟減! 宜家睇番當然覺得個差價值得俾, 最重要無驚無險準時抵埗!
      嘻嘻, 老公都話我痴線, 點會安排即日飛, 但咁樣係最慳時間嘅做法 ^^
      真係超好呀! 嘩, 咁快諗定下次 ^o^

      刪除
    2. 要戒喪影,我都只係戒到少少。如果唔戒下,又真係執屎@@

      刪除
    3. 明呀小月, 我係一諗到唔影就會miss, 嗰一刻可能就係最靚嘅光線, 即刻又影過, 至多做到停一秒, 諗一諗, 不過下一秒繼續影囉 >.<
      當超多相遇上選擇困難, 真係好救命

      刪除
    4. 我D相都係差唔幾😝。加油呀!

      刪除