2016年7月21日 星期四

Day 3 阿根廷伊瓜蘇國家公園Part 1──魔鬼之喉


**南美、南極篇將全部使用粵語


相片太多,預計文字都唔會少,所以將Day 3分開上、下篇寫。嘻嘻,宜家得閒就勁詳細,返工後唔知會唔會將幾日炒埋一篇呢?

今篇會寫阿根廷伊瓜蘇國家公園Parque Nacional Iguazú。先寫背景資料同旅遊資訊,睇遊記嘅可以scroll down ^.*


伊瓜蘇瀑布有幾勁?
伊瓜蘇瀑布係世界上最大嘅瀑布體系,喺聯合國世界自然遺產中榜上有名,仲被譽為世界三大瀑布之一,同非洲嘅維多利亞瀑布Victoria Falls、北美嘅尼亞加拉瀑布Niagara Falls齊名。


伊瓜蘇瀑布喺邊度?可以喺邊啲城鎮落腳?

睇下方地圖[可按圖放大],伊瓜蘇瀑布(橙色圓圈)喺阿根廷同巴西兩國之間,以伊瓜蘇河為國界,兩國分別設立咗國家公園,而伊瓜蘇瀑布群大部份喺阿根廷國境之內,所以要睇伊瓜蘇瀑布最靚、最有氣勢嘅一面,阿根廷嗰邊係必去嘅!


地圖入面粉綠色標示係阿根廷嗰邊嘅國家公園,被粉綠色方框框住嘅Puerto Iguazu就係唔少旅客選擇嘅落腳點,我哋入住嘅酒店(粉紫色標示)都喺Puerto Iguazu呢個小鎮入面。

圖中右上方嘅綠色標示係巴西嗰邊嘅國家公園,我哋旅程第四日會過去,而翠綠色方框Foz do Iguaçu,見啲字變晒葡文,應該都估到係巴西嗰邊嘅城市喇,呢個就係去巴西伊瓜蘇國家公園的話,唔少旅客會揀嘅落腳點。

圖中仲有個深藍方框未講,嗰度係巴拉圭嘅城市Ciudad del Este。原來喺巴西Foz do Iguaçu過條橋就到巴拉圭Ciudad del Este,所以有啲旅客會選擇喺巴拉圭落腳,但據聞治安係三地之中最差嘅!

可以見到呢三個邊境城鎮好接近,連地圖喺mark完城鎮名之後都過晒灰色嗰條國界。簡單啲講,阿根廷同巴西以橫向嘅伊瓜蘇河為界;巴拉圭就以直向嘅巴拉那河與阿根廷、巴西為界。


阿根廷伊瓜蘇國家公園開放時間及收費:
我哋年初入場時仲係ARS260,宜家加到ARS330,雖然加咗少少,但都仍然係百零蚊港紙,好抵睇!出發前可以去上面條官網連結度check吓最新價格。
連續入兩日的話第二日有半價,詳見以上連結。

遊覽路線
官網出到英文,分好晒路線,又有園內地圖,好易明!
就攞官網張地圖解構吓(可按圖放大)


基本上分上路(紅色)、下路(藍色)、魔鬼之喉(右上方橙色)三大路線,當中以魔鬼之喉係伊瓜蘇瀑布群裡面嘅精華所在,千萬唔好miss!另外有Green Trail(綠色)、Macuco Trail(左下方橙色)同San Matin Island(黃色)嘅健行路線。

國家公園範圍都幾大,所以有Rainforest Train穿梭三大站,近入口處嗰個係Central Station,中轉嗰個係Cataratas Station,尾站係Devil's Throat Station,班次時間睇下面連結,比較晏入園嘅記得睇尾班車時間:

參考路線
我哋當日喺入口處行去Central Station搭小火車,到中轉站Cataratas Station必須全車落晒,然後排隊轉另一架小火車上去睇魔鬼之喉,今篇只會記呢段行程。
睇完魔鬼之喉後搭番小火車落Cataratas Station,然後先行上路,再行下路,跟住懶得等小火車,直接行Green Trail落番Central Station離開,呢段行程會喺下篇blog度寫。
因為當日San Martin Island冇開,所以我哋只係冇行到Macuco Trail,而呢條Trail官網資料要行3個鐘,仲有一小段屬於高難度,所以冇打算行。

遊記


朝早七點幾自然醒,落餐廳食個早餐,食物選擇多,望住落地玻璃外嘅熱帶雨林景,終於覺得自己身處南美洲。




食飽就開始行程喇,叫酒店職員幫手call車去伊瓜蘇國家公園,呢程大約二百零蚊港紙。記住講明係去阿根廷呢邊,否則車咗去巴西過關就大劑!



好靚嘅藍天,萬里無雲,難得嘅好天色!





買飛入閘後行去Central Station搭小火車






去到中轉站Cataratas Station需要全車落晒再排隊等另一架小火車上魔鬼之喉。條隊好長,排到出露天位置,小火車班次又疏落,我哋等到第二班車先上到。見排到咁,都有諗過不如行咗上路同下路先,但又驚晏咗都係多人,天色又唔知有冇咁靚,所以都係決定繼續排。


都唔知有冇決定錯,當晚淋浴時發現頭皮痛,原來曬傷咗,照鏡見到髮界位紅晒,我哋係等小火車時冇拎遮咋,所以一定係呢吓曬傷嘅 >.< 吖,仲有,南美人係會打尖架,仲要係技巧純熟嗰種,所以一係keep住戒備狀態;一係當成EQ訓練喇!





落咗小火車後要行一段路去睇魔鬼之喉,沿路可以欣賞伊瓜蘇河。






行行吓見到水氣,即係差唔多到魔鬼之喉喇!





魔鬼之喉有80米落差,因為落差高同水嘅流量大,因而成為伊瓜蘇瀑布群裡面公認最氣勢磅礡嘅。


現場聽聲同睇到啲水氣都覺得好有氣勢!


企喺最近魔鬼之喉嘅觀景台上,正對岸就係巴西。















咁多水氣,應該好易有彩虹,果然喺瀑布底見到,不過位置太低,同唔到瀑布一齊影添!





沿路行番去小火車站,一路行一路回頭追拍多幾張。








沿路仲見到南美浣熊,毛毛動物都好得意,但佢哋成堆行過嚟,都有啲驚。我諗佢哋都驚我哋,有啲爬番落樹度。



睇吓掛喺欄杆隻BB幾可愛,仲識望鏡頭添 ^^  catwalk大熊都唔錯,形態好優美 ^^







行吓行吓,仲見到隻藍鴉Cyanocorax chrysops



好喇,出番嚟魔鬼之喉個牌,影番張相先。


等小火車落番去中轉站



到中轉站Cataratas StationCataratas係西班牙文,解作瀑布),呢度可以行上路同下路去睇伊瓜蘇瀑布群,都好靚架,待續


南極郵輪、阿根廷、巴西伊瓜蘇2016目錄頁


Copyright © 2016 by Venus. All rights reserved.

您可能會對以下博文感興趣:
centara ras fushi 大加納利島 悉尼大橋 朗伊爾城
馬爾代夫
大加納利島
澳洲悉尼
北緯78度-朗伊爾城

27 則留言:

  1. 陽光真係好勁,你地竟然無戴太陽帽咁勇@@
    喉嚨上面條橋超多人呢
    成群浣熊走埋來又真係會有啲驚喎!!!

    回覆刪除
    回覆
    1. 我有戴太陽帽呀, 可以遮晒全塊面, 加埋擔遮同搽防曬, 都係曬到前所未有咁燶, 無奈 >.<
      係呀, 見咁嘅形勢都擔心唔知點攝埋去, 點知行到埋去又ok喎, 啲人影完相都識行開
      好在身上冇食物, 所以啲浣熊無視我哋, 如果有食物的話, 佢哋會埋身架, 實嚇c

      刪除
  2. 講真!!勁有氣勢!!!!!!!!!!!!!!!!!!!!!!好想親眼一睇~可惜今次放棄左佢睇左另一樣你放棄左既野~~~~~~~我一定會再去~~~~
    好可憐呀!!!!!!咁咪好鬼痛囉頭皮!!!我發現南美d陽光真係唔講得少!!
    浣熊好可愛~~

    回覆刪除
    回覆
    1. 係呀, 三大瀑布我淨係睇過呢條咋, 所以真係覺得好勁! 唔..好在呢日天色咁好, 我都覺得自己冇揀錯嘅, 但都係會想去莫雷諾冰川, 希望將來有機會啦, 等睇妳寫莫雷諾, 加油!
      都痛咗幾日呀, 唯有個花灑唔直射曬傷嘅地方囉, 學識咗搽防曬要搽埋髮界囉 >.<
      尤其浣熊b

      刪除
    2. 唉呀...3條我到依家都係一氣都未睇..................真係太好天得滯~~~
      莫雷諾也是超美的!!!!!我無後悔揀左佢而無去瀑布~~~~~~因為我知我會再去阿根廷~
      查落髮界會唔會好油呀???我會戴帽或擔遮...真係曬到好恐怖!!

      刪除
    3. 唔緊要, 我知妳好快會去睇 ^^
      我feel到妳嘅雄心, 利害! er..我應該都會去睇莫雷諾, 不過相信唔會係好近嘅事
      ok喎, 揀creamy兼透明質地嗰啲, 我頂太陽帽係冇頂架救命, 不過擔遮真係有用, 為咗白, 絕對唔怕擔遮。應該發明吓金鐘罩式防曬添, 全方位罩住個人, 呵呵

      刪除
  3. 背景資料很齊很有用。
    D風景好靚,一定要帶部靚相機。

    回覆刪除
    回覆
    1. 多謝欣賞 ^^
      係呀, 景靚天色靚! 不過我影相唔係咁叻, 所以冇買靚機呀

      刪除
  4. 去完冰島都覺瀑布勁, 睇完你影既伊瓜蘇瀑布相, 覺得呢個瀑布仲誇, 氣勢跟本冇得同冰島或其他瀑布相比.

    回覆刪除
    回覆
    1. 冰島地貌豐富乜都有, 但島仔細細, 所以冇咁大型
      唔..冰島安全又適合自駕, 多去無妨! 阿根廷就又遠又要提心吊膽, 我會寧願睇多幾次袖珍版

      刪除
  5. 剩係呢度都謀殺不少相片, 比心機整理!

    回覆刪除
  6. 個瀑布真係好澎湃呀!齋睇呢個公園, 規劃同管理都好似好好, 地方好乾淨喎...

    回覆刪除
    回覆
    1. 係呀, 名不虛傳!
      有同感呀, 地方係比預期乾淨, 呢個景點絕對有國際水準

      刪除
  7. 酒店早餐真喺好正
    可以坐小火車好有趣,
    到瀑布區又幾方便,
    終於近距離睇到伊瓜蘇瀑布喇,
    魔鬼之喉好壯觀,但條橋...好似危險咗啲

    回覆刪除
    回覆
    1. 係呀, 好滿意
      架小火車係用環保能源添, 估唔到好似落後啲嘅地方有呢種概念
      係呀, 震撼, 有氣勢!
      橋上面太多人喇, 不過啲欄同地面感覺上都穩陣嘅

      刪除
  8. The fall is really magnificent in close-up view.

    回覆刪除
  9. 巴拉圭東方市都聽聞極度危險,但去到後竟然見到有人攞大機出嚟影相,看來恐懼大過真實嘅狀況。
    真係好佩服Venus你成日都咁詳細,po得又多相,我好鬼懶。

    回覆刪除
    回覆
    1. 我見到呢啲大安旨意嘅人就會扯扯哋火, 大部份鬼都係咁樣, 我係完全唔明呢啲人諗乜! 人身安全, 財物安全幾時都應該自己最緊, 仲大搖大擺走去測試人家嘅治安, 真係..唉!
      反正消化咗啲資料, 唔寫遲啲就唔記得。相po得多係因為揀唔走咁多, 同埋唔po嗰啲我諗幾年都唔會睇一次, 所以幫我記到個旅程嘅, 影得唔錯嘅都盡po

      刪除
    2. 都未必嘅,看來當地治安無比想像中差啫,好似我係非洲時一樣。
      將財物周圍擺大安旨意就真係扯火啦,好似我早前遇上初出茅廬嘅德國靚仔一樣,算佢初出茅廬無經驗,但我真係見好多人都係咁。

      刪除
    3. 可能同佢地既生活環境有關

      刪除
    4. 小月分析得有道理呀, 如果佢哋係來自小鎮而唔係大城市, 真係應該唔知咩叫戒備

      刪除
  10. 我地上次係buenos Aires 搭地鐵,都俾乘客叫我地小心大機,不過我地自己就感覺安全。我覺得歐洲有D國家仲多賊

    回覆刪除
    回覆
    1. 小心啲都好嘅, 我都覺得當地人幾友善, 同埋好同意buenos aires嘅感覺係好過歐洲。危險首推巴黎, 直情有羊仔走入狼群嘅感覺

      刪除
    2. 我朋友都話西班牙成條街都係賊😅

      刪除
    3. 我覺得馬德里安全過巴黎呀, 我哋正夏天熱辣辣喺正中午行景點, 曬到成街都冇乜人, 勁安全, 黃昏啲人多番, 我哋已經ko啲景點番酒店

      刪除