Day 3 阿根廷伊瓜蘇國家公園Part 2──San Martin瀑布

**南美、南極篇將全部使用粵語

上回講到阿根廷伊瓜蘇國家公園入面最精彩嘅魔鬼之喉，跟住睇番官網張地圖先，魔鬼之喉就喺圖嘅左上方，剛好喺阿根廷同巴西國境之間。今回繼續Day 3行程，會行園內嘅上路（紅色路線）、下路（藍色路線）去睇伊瓜蘇嘅其它瀑布，然後行地圖中間嘅Green Trail（綠色路線）落番去國家公園出口。

上路同下路兩條健行徑嘅入口都喺小火車中轉站Cataratas Station附近。

行入去冇耐又見到南美浣熊，呢批遊人唔多守規矩，又摸又餵。

過埋呢個牌就係上路、下路嘅起點，兩條健行徑差唔多長，上路易行啲，下路有樓梯。

成日覺得高位影相會靚啲，所以我揀行上路Upper Circuit先。

喺上路行一陣就會見到個幾震撼吓嘅全景，由近至遠係Dos Hermanas、Chico、Ramírez、Bosetti、Adán y Eva、Bernabé Méndez、Mbiguá同San Martin瀑布。

San Martin瀑布就係上圖中特別闊，啲水偏黃嗰道瀑布，佢係伊瓜蘇瀑布裡面第二大嘅。

過咗個全景位後繼續行，園內瀰漫住水氣，久不久見到彩虹。

上數圖最靠近鏡頭嘅係Bosetti瀑布，喺上路睇冇乜特別，等陣落去下路會變得好有睇頭，水花四濺。

形態似獅子嗰舊石嘅開面就係剛才提過嘅San Martin瀑布，園內第二大，等陣落去下路可以睇得更清楚。

返起點途中又見到南美浣熊

向下路Lower Circuit出發！

先嚟細長嘅瀑布Alvar Nuñez，可以見到清晰嘅雙彩虹，好靚呀！

行過啲見到個天然嘅門廊，呢度係San Martin島嘅外側，條水道可以通去魔鬼之喉。

跟住條健行徑會轉入去，San Martin島就喺正對面，喺佢隔鄰嘅就係San Martin瀑布。

再嚟雙彩虹

如果玩衝瀑布的話，就係衝呢條園內第二大嘅，而唔係魔鬼之喉。

到Bosetti瀑布喇，剛才喺上路睇覺得冇乜特別，行近睇好有氣勢呀！轉用手機影先，啲水花太勁喇！

經過Dos Hermanas Square又完成下路嘅行程喇，行晒兩條健行徑後覺得下路精彩啲。

路過園內嘅唯一一家酒店。

喺起點又見到好多浣熊，睇嚟數量好多，仲見到鱷魚添！

本來想搭番小火車落Central Station，但見條Green Trail得600幾米，可能行仲快過等，於是就行喇，沿路又見到浣熊。

去到Central Station附近有幾間店，有個展覽，冇乜心機睇，淨係想番酒店沖涼，真係好熱、勁熱、勁爆熱！

出咗國家公園先醒起呢次死火，出發前冇book定車番酒店！望晒成個範圍一架的士都冇，但有架現成巴士喺度，去市中心嘅。

我prefer等的士，因為可以直到酒店，否則去咗市中心的話，又係要諗計返酒店，盞搞！老公就覺得一場嚟到冇理由唔去Puerto Iguazú市中心行吓，但我嗰刻淨係想番酒店沖涼！之後老公出殺手鐧，話驚的士會唔知車咗我哋去邊。激死！出到人身安全呢招，你贏！

喺站長伯伯度買飛，ARS50 per head，即廿零蚊港紙一位。

其實好驚巴士車廂污糟，但比想像中乾淨好多，而且超多人搭，之後全車滿座之餘仲連企位都滿晒！

市中心停幾個站，沿路啲屋殘殘舊舊、甩甩爛爛咁，睇嚟伊瓜蘇瀑布每年吸引咁多遊客都冇令到呢個小鎮富裕起嚟！

巴士總站有條天橋通去商場，天橋一開始嘅部份係巴士總站個頂，睇到成個頂鋪滿垃圾，喺天橋度快快手拎部相機影咗對面幢甩爛樓之後都唔敢拎住相機周圍走喇，係時候開番個高度戒備模式。

巴士總站隔鄰個商場，佔咗大部份係啲細細間嘅旅行社，亦有唔少吉舖，嗰層暗暗沉沉，行行吓有啲驚。落一層光猛啲，有間屋邨快餐店look嘅食肆，仲有一間雪糕店。

喺雪糕店坐咗陣商量點行，買咗杯ARS45嘅雪糕，可能攰到唔想食，合二人之力都食唔晒。決定咗先行San Martín Plaza，然後去Hito Tres Fronteras睇Iguazú同Paraná兩河匯流，嗰度仲可以望到巴拉圭同巴西，係三國嘅交界處。

離開雪糕店後，喺附近見到間似樣嘅餐廳，不過當時只係晏晝四點幾，餐廳未開，於是老公想俾啲動力我，話去完Hito Tres Fronteras就返嚟食埋嘢先番酒店。好啦，收到老公嘅鼓勵，雖然我情感上仍然係最想返酒店沖涼，不過理智上明白出得嚟市中心應該要行吓嘅。

沿路行去San Martín Plaza，大約十幾廿分鐘路程，市面殘舊，行人唔多，久唔久有車經過。只係「殘舊」呢點已經足夠觸動我嘅神經，不斷提老公唔好行近馬路，背包同相機唔好孭喺向馬路嗰邊，有人迎面行嚟或跟喺我哋後面要覺住對方有冇動作。一路嘅情況還可以，直到迎面轉出幾個學壞look嘅青少年，呢種年紀係最惡、最冇規範架嘛，我feel到連唔多識驚嘅老公見到呢班青少年出現都打個突，我就睇定對面馬路有間有人嘅小店，有咩事可以向嗰個方向求救，最後好在係自己嚇自己，有驚無險。

終於到San Martín Plaza，附近有間警局同教堂，見只係得幾個婦女喺度傾偈，應該ok卦，拿拿林拎部相機出嚟影幾張即刻收番埋。

喺呢啲高度戒備嘅情況下，我諗老公俾我嚇到好攰，見前面行去Triple Frontier段路好似仲靜咁，佢都唔堅持喇，問我係咪想返酒店。係就係，但點返？！剛才喺商場見到有call車公司，呢度乜都冇喎！企喺馬路邊觀察咗一陣，決定揀最似真的士嘅嚟截，嘻嘻，唔好以為我哋痴咗線，因為當地有啲車就咁印咗的士字樣，我哋都唔知嗰啲係咪正規嘅，但有啲就企企理理好新嘅，印有的士字樣之餘仲印埋電話號碼喺車身，我哋決定揀嗰種嚟截。

總算冇上錯車，按錶收費，個司機仲識少少英文，落車發現唔夠披索俾司機，酒店話冇兌換服務，好在司機肯收美金，呢程7蚊美金，老公話司機俾咗個靚rate我哋。

Yeah，終於安全返到酒店喇 \(^0^)/

Day 4會跟local tour過巴西嗰邊嘅伊瓜蘇國家公園，因為擔心自行過關會出問題，雖然特區免簽，不過我哋呢啲穩陣派都係唔想冒任何風險或者出任何亂子，所以就算酒店話俾我哋知英文團已經full晒，淨係剩番西班牙文團，我哋都照join，反正重點係順利過關同有人安排好晒交通。

到南極郵輪、阿根廷、巴西伊瓜蘇2016目錄頁

到「Venus遊世界」總目錄

您可能會對以下博文感興趣:

加拿大白馬周邊	大加納利島	新西蘭南島	格陵蘭海上極光