2016年9月5日 星期一

Day 11 南極第二站下篇──世外桃源Weddell Sea




完成Brown Bluff嘅登岸後去餐廳食lunch,靜靜哋冇乜人,可能因為今日輪到Group 2先登岸,我哋係Group 4,屬於早嗰批,所以玩完上番郵輪都冇乜人返到。



飯後差唔多長留甲板,天色實在太靚喇,襯到啲冰都特別靚,唔睇會好嘥!








下圖嚟自Hurtigruten送俾乘客嘅光碟資料,右下角係Day 11嘅航線,Brown Bluff呢個登岸點位處Antarctic Sound南極海峽,完成登岸活動後會Antarctic Sound駛去Weddell Sea威德爾海。然後喺Day 12回航返去South Shetland Islands,參觀中國南極長城科研站Great  Wall Station


先睇埋Antarctic Sound嘅景先























跟住郵輪會駛入Weddell Sea,據講Weddell Sea更人跡罕至、更世外桃源。嚟個圖解先,因為唔少郵輪喺過咗South Shetland Islands之後會好似下圖綠色箭咀嘅方向咁沿南極半島南下,比較少行另一邊去Weddell Sea


 Weddell Sea有部份海域長年冰封,亦都被科學家證實擁有世界上最清澈嘅海水。我覺得"最清澈"之名Weddell Sea真係當之無愧,因為唔洗睇個mon,單憑肉眼已經知道入咗Weddell Sea,睇吓,海水變得更平靜、更細緻。











記得入到Weddell Sea嘅時候,喺度諗呢個究竟係咩地方,點解可以靚得咁交關!不過啲相反映唔到實景嗰種靚,我亦都無法用語言、文字去形容。醒起方東昇喺世界零距離講過嘅金句:「美景當前,任何語言、文字、圖片都顯得蒼白無力!」


話時話,究竟大台幾時先肯將世界零距離III合番做半個鐘一集,等咗好耐喇,宜家碎濕濕咁每次播得嗰幾分鐘真係冇心機睇囉!


喺甲板吹咗幾個鐘,凍到意志力驟降,走咗去沖杯熱朱古力,搭Fram的話記住用4樓茶水間部熱朱古力機,真係好香、好濃、好好味!飲完勁有罪惡感,拿拿林上番甲板再影過,順便等低溫幫手消耗番體內杯熱朱古力出嚟!


咦,水面有啲唔尋常嘅黑影水紋,冇耐就意識到係鯨魚嚟嘅,跟住船上都有廣播話發現鯨蹤。



















好易認,係殺人鯨killer whales呀,有尖鰭同見到黑白色。







另外仲見到幾次企鵝游水,但佢哋好高速,反應得嚟已經唔知去咗邊,今次只係影到一張咋,仲要未zoom >.< 一路到郵輪旅程尾聲先再影到張近啲、清楚啲嘅。


下晝五點幾去聽翌日行程講座


跟住再上甲板影過,我都覺得自己好癲,雖然好好陽光,但係當時得兩度咋。總之好天色難求,尤其喺變幻莫測嘅極地,所以有就要珍惜,影盡每分每秒!










係喎,有開心嘢要記低,大家都見我乜景都話靚架嘛,所以多數係得我一個喺甲板影相架咋,咁呢,有啲郵輪朋友見我咁癲,上親甲板幾乎都會見到我就過嚟傾幾句,閒聊幾句好平常啫,完全唔覺得係咩一回事。點知到呢次郵輪嘅尾聲,即個幾星期後嘅某日、某層甲板度,嗰次我又啱啱同個郵輪朋友傾完偈,老公就突然間閃埋我身邊話:「條友都幾黐妳喎,成日見佢撩妳傾偈!」嘩,呢嘢真係忍唔到笑,醋味好濃喎!成日覺得自己獨自一個喺甲板影相有啲孤獨冇人理,咁靚嘅景又冇人陪睇,原來唔係架,老公係會離遠睇住我架,被重視嘅感覺真好,開心得嚟又有少少感動。



















六點幾去餐廳食晚飯,食飽飽再上甲板影過。












到晚上八點幾,郵輪上有廣播話會停駛一陣,等大家影吓企鵝棲息地Madder Cliffs。嘩,真係好誇張、好壯觀呀,據講呢度有過萬隻阿德利企鵝。










影完企鵝就返房沖涼同抖抖,等接近日落再影過。喺二月初南極嘅夏天,夜晚九點幾先日落,紫色嘅天空好迷人。































夜晚十點有廣播話七樓甲板有挪威特色美食,我哋都有去試試,不過味道麻麻。跟手影多陣日落,覺得寒風刺骨到頂唔順就返番入船艙喇。











呢日雖然得一次Brown Bluff嘅登岸,但真係好豐富、好滿足!



南極郵輪、阿根廷、巴西伊瓜蘇2016目錄頁

「Venus遊世界」總目錄


您可能會對以下博文感興趣:
新西蘭南島 泰德峰 冰島西北部 極光城
新西蘭南島
西班牙第一高峰
冰島西北部峽灣區
挪威極光城特羅姆瑟

Copyright © 2016 by Venus. All rights reserved.

19 則留言:

  1. 啲冰山四四方方咁好得意
    睇到成個山都係企鵝好壯觀,證明附近海域好多魚捉
    影到殺人鯨又影到企鵝游水真正!!!
    喱度好似已經無乜鳥類喎(唔計企鵝)

    回覆刪除
    回覆
    1. 係呀, 嗰啲係冰架 ^^
      應該係喎, 搵到食先留喺度 ^.*
      er......其實都有鳥類嘅, 啲登岸點會見到幾隻, 不過掛住影企鵝, 一來企鵝得意啲; 二來捨難取易, 雀難影好多 >.<

      刪除
  2. 第一張相靚到痴左線!!!!!!!!!
    真係真係真係好靚!!!!!!!!!d冰好得意!!!好多都四四正正咁~~好多舊都係咁!!!!
    我好鐘意你影一舊舊海上既冰然後企鵝企係冰上面~~~好可愛~
    但過萬隻企鵝真係會有密集恐懼症~~~~
    老公會呷醋係好事唷~~~~~~~~
    咁你老公無成日上甲板影咁佢會做咩架?做運動??
    係喎前個禮拜你話你唔舒服你好番未呀??

    回覆刪除
    回覆
    1. 藍色嘅層次好靚, 倒映又清, 我都好鍾意
      係呀, 所以要花好多時間揀相
      大開眼界, 但真係太密集喇!
      嘻嘻, 係嘅, 我覺得好搞笑囉, 幾廿歲人~
      我覺得佢周圍八囉, 事無大小佢都知架(滴汗), 但佢自稱成日喺嗰3層甲板度蕩, 搵靚景叫我影喎
      嘩, 小t仲記得, 妳真係幾時都咁sweet :) 差唔多好晒囉, 仲有少少咳未清

      刪除
    2. 係呀!!!!影得好好!!!!!
      我堅明揀相的難度...呢張又好...哥張又好~
      係呀...我係現場睇一定打冷震~~~~
      幸福至真啦~~~~~~~
      wakakaka~~~原來你倆會分頭行事架~~~~~做咩唔手拖手一齊去甲板影相呀~~~好溫馨唷~~~~~~~waakakaka~~~
      咁你要飲多水喇知嘛~要快d好番~咳真係好辛苦~鍚番*3*

      刪除
    3. 郵輪唔算泊得好埋, 加上個山遮咗啲光, 所以唔係睇得咁清楚, 我頂得住冇打冷震 ^^
      成日都分頭行事架, 可能我影得太癲喇, 佢唔多影又真係好難全程陪喺我身邊嘅 >.< 唔..冇識嘅人的話, 又冇乜相影的話, 我係黐身類嚟嘅。但郵輪呢, 兩個幾星期見住同一班人, 黐實的話就唔係咁好睇, 況且真係太多嘢影喇, 唔得閒理佢, 呵呵! 我只期望有極級靚景睇時, 有人識自動出現陪睇一陣就最正喇 :)
      知道, 錫晒小T *3*

      刪除
  3. 我諗緊點樣可以張咁純潔嘅Weddell Sea帶出嚟呢?我唔識點去影⋯⋯
    D相好靚,你就係成日咁影相引埋D狂風浪蝶,令到老公呻醋!
    好多企鵝呀!

    回覆刪除
    回覆
    1. 你攝影技術好啲, 應該可以影到, 我只係企喺度試用唔同嘅mode影咋 >.<
      狂影嘛, 點都有啲見得人, 但啲相真係反映唔到實景嘅靚, 所以我覺得麻咋, 不過多謝欣賞先 ^.*
      冤枉呀! 傾幾句之嘛, 邊係狂風浪碟, 我驚以後冇人敢同我講嘢 ^^" 不過有人呷醋係幾開心喎, 嘻嘻
      數量上好多, 不過旅程中見到嘅品種唔算多, 期待下次見多啲 ^^

      刪除
    2. 有時我地影嘅相真係反應唔到真實嘅靚,又有時我地影到誇張左真實嘅靚噃。
      我上次係阿根廷睇到嘅係麥哲倫企鵝

      刪除
    3. 唔..我只係諗到極光會係相片靚啲, 因為長時間曝光。其他時間應該都係實景正好多, 相機始終影唔到眼睇嗰種闊度、深度同空間感
      噢, 冇見到呢種呀

      刪除
  4. 回覆
    1. 係呀係呀, 多層次嘅藍的確超靚 :)

      刪除
  5. 相好靚!!! 波平如鏡. 想請教點影到??
    重有醋味好濃, 隔住個MON. 都感覺到, WAHKAKA

    近年去旅行我多數用傻瓜機影相算. (有帶單眼機去, 但已經較小用)

    回覆刪除
    回覆
    1. er......用auto mode(講完都覺得唔好意思)>.< 其實實景仲靚, 我覺得啲相未如實記錄到。不過多謝欣賞先, 證明大包圍策略總會撞手神影得好 ^.*
      好搞笑, 可能人到中年係咁, 呵呵 ^0^
      宜家啲傻瓜質素唔差, 單眼太重喇, 我轉咗用無反, 其實都輕不了多少, 或者用用吓都會轉番傻瓜

      刪除
  6. 企鵝多到呢..好似芝麻餅咁!
    天空真係冇雲喎.

    回覆刪除
    回覆
    1. 係呀係呀, 好芝麻餅^^ 啡色係餅身, 企鵝似芝麻, 妳一講我即刻覺得激似!

      刪除
  7. d景好靚呀!! Welldell sea真係靚到唔可以用字去筆錄形容. 企鵝多到影唔哂.

    回覆刪除
    回覆
    1. 實景再靚啲
      係呀係呀, 大開眼界, 無諗到可以多成咁!

      刪除