Day 20-22從南極回到世界盡頭──Drake Passage、烏斯懷亞Ushuaia

**南美、南極篇使用粵語

又個幾月喇，出完上篇Blog之後呢，我記得嗰個星期係得閒啲架，但諗住唔洗出得咁密，之後就一直忙喇！我懷疑自己潛意識唔想寫完南極之旅，一日未寫完，一日好似同呢個白色世界仲有連繫咁。

忙嘅日子終於告一段落，係時候抖抖，下星期初就飛喇，會第四度踏足冰島，另外會去幾個陌生的國度，facebook專頁同instagram見喇！

Day 20

早餐後返房睇浪，之前講過今次嘅郵輪旅程來回都冇遇上巨浪。呢日啲浪都屬於正常，但喺郵輪上行走，間中會行唔到直線周圍撞。

好啦，一齊欣賞吓呢條有世上最危險航道之稱嘅Drake Passage。

睇完浪去聽講座，呢位講者次次都準備充足，又有嘢學，正！

聽完就去食lunch，然後喺郵輪上周圍行，睇下我哋喺南極嘅足跡。

跟住再聽講座

然後食下午茶，無意中發現郵輪上嘅報紙竟然有香港新聞。好在唔喺香港，否則新年流流都搞到唔開心，實在好憎班暴徒！

晚餐終於唔係buffet，fine dining我鍾意呀！

Day 21

呢日早餐後去bridge visit，其實係同一艘郵輪，上次北極三島時已經參觀過，不過海上航行嘅日子冇乜嘢做，所以今次都有報名參觀。

參觀完駕駛室就去聽講座，呢個講座令我印象深刻，雖然唔係學術性，而係個人故事分享，不過呢位講者所做嘅嘢，我肯定呢世都唔會做，同埋佢影啲相好靚，好似帶緊我去遊歷美好大世界咁，超精彩！

上圖玩緊snowboard嗰位就係挪威籍嘅講者，據佢所講，啲相全部係佢自己set機自拍嘅，好利害，捕捉到精彩嘅瞬間。

講座接講座，但呢場個講者超悶，於是轉過隔鄰講廳聽另一個講座。

跟住食lunch，lunch之後天氣轉差，浪大咗，於是返房睇浪，我喜歡睇到風嘅痕跡。

記得呢程船，有一晚晚飯嘅時候幾大浪吓，成艘郵輪被拋上浪頂，當時透過餐廳嘅落地玻璃睇得好清楚海水嘅層次，好靚，不過嗰個moment幾狼狽，要顧住平衡又要顧住餐具，好在眼尾睇到，只可惜未能夠用相機留住。

呢日午後終於見到陸地喇，差唔多兩日冇見過陸地，呢度係南美洲嘅最南端，智利嘅領土，叫Cape Horn合恩角。

呢啲一直嚮往嘅地名，竟然可以一一走近，又有一刻感動。記得廣播話因為天氣問題要避開部份海域，於是我哋艘郵輪會穿梭於太平洋同大西洋兩大洋之間。

出甲板影夠之後又去聽講座，呢個都係冇聽晒嘅，南極呢程船啲講座冇之前北極三島嗰程咁有水準，嗰次我差不多全部聽足架 >.<

聽完講座休息一陣又食晚飯喇，今次冇影齊咁多道菜，因為食食吓見到彩虹分咗心。

傍晚喺Panorama Lounge舉行Captains farewell cocktail。

杯mocktail好好飲，次次未到舉杯已經飲晒。

然後係Charity Auction，為Antarctic Heritage Trust籌款。今次呢程船冇內地土豪撐場，競投氣氛冷清。

今餐係郵輪旅程嘅最後一餐晚餐，食到尾聲有驚喜！

夜晚要執行李喇，有一萬個唔捨得 >.<

Day 22

郵輪返番去南極旅程嘅起點──烏斯懷亞Ushuaia喇，食完早餐上甲板影相，呢日嘅烏斯懷亞天色好好，喺甲板睇到唔捨得走，光線每一刻都唔同。

世界盡頭嘅清晨真係好靚，下次再嚟唔知會係幾時呢？

郵輪乘客會分兩班機飛返阿根廷首都Buenos Aires，早幾日要回覆揀搭邊班機，我一聽到宣佈即刻飛奔去reception counter，快到連工作人員都未準備好，神心到咁固然如我所願啦，我揀咗晏啲飛嘅charter flight，一來可以留喺郵輪上耐啲；二來可以喺Ushuaia行多幾個鐘，唔想咁快返大城市嘛；三來charter flight只有郵輪客，感覺好似郵輪旅程仲未完咁。

朝早八點幾落船喇，有旅遊巴車我哋去Ushuaia市中心，其實Ushuaia好細，由碼頭去市中心係步程，不過port內唔俾人周圍走，所以全部旅客要搭旅巴，不消五分鐘已經落車。

從落車處嘅海旁望番艘郵輪，海面倒影動人！

落車後喺Ushuaia周圍逛，大部份景點喺Day 8已經介紹過，去圖。

海旁嘅遊客中心，入面有得免費拎世界盡頭證書，同埋可以喺passport蓋印。

Ushuaia一隅

行行吓市中心發覺啲舖陸續閂門，街上人同車都少咗，原來係午休時間，於是出海邊行吓。

海旁嘅世頭盡頭牌

差唔多時間喇，要上番旅遊巴去機場

旅遊巴開車後，不斷透過車窗追拍郵輪，真係好唔捨得呀！

架charter flight都係用LAN，呢間係南美洲最大嘅航空公司。

三個幾鐘後到達Buenos Aires

等行李嘅時候記住唔好嘥時間，可以去啲call車公司櫃位格價，我哋熟行喇，分頭行事，間間都問吓。

車都Call埋喇，條belt仲係人頭湧湧！

AEP機場一隅，呢個係好近市中心嘅內陸機場。Buenos Aires仲有另一個遠離市區嘅國際機場EZE。

等咗冇耐就有司機嚟接我哋去酒店喇

臨返香港前想豪一豪，揀咗Alvear Palace Hotel，佢係一間歷史悠久嘅豪華酒店，喺當地嘅地位就好似香港嘅半島酒店咁。

大堂係睇得出有氣派嘅，但個人嚟講唔係咁鍾意呢種風格。啲職員好有禮貌而且服務周到，英文亦都好好（當地講西班牙語，普遍地英語並唔通行），果然係五星級大酒店。

聽朝食早餐嘅地方

睇完大堂，睇吓走廊先，都唔錯，感覺高貴。

到房間喇，不過不失，房間其實唔細，可惜房形古怪，啲位唔實用。

送咗個生果盤同兩支阿根廷常見品牌嘅礦泉水，最欣賞係toiletries用Hermes。

本來返到房就唔願郁，但呢度值得見識一下，於是休息一陣就四圍貢。

行咗去Spa & fitness center，特別欣賞條走廊。去到門口有個職員禮貌地打招呼，同佢講我哋想參觀一下，佢好殷勤咁帶我哋入內參觀，沿路介紹各種設施，服務超好。

酒店泳池，出乎意料地細。因為有人用緊，所以冇對住個泳池影喇！

跟住去business center望望，我鍾意呢層呀，藍色配金色，除咗高貴，仲特別優雅！

翌日喺Buenos Aires留半日，就搭下晝四點幾嘅航班飛去荷蘭阿姆斯特丹，喺當地玩幾個鐘就返香港。由南半球嘅夏天飛到去北半球嘅冬天，阿姆斯特丹仲要時雨時雪，呢個旅程打破咗自己四個紀錄，包括經歷最大溫差、跨越最大緯度、創最南緯度同最長飛行時間，係特別難忘嘅一段旅程。

南美、南極篇未完架，仲有Buenos Aires半日遊同幾個鐘快閃Amsterdam，等我八月中返嚟寫埋佢，facebook專頁同instagram見喇 ^.*

到南極郵輪、阿根廷、巴西伊瓜蘇2016目錄頁

到「Venus遊世界」總目錄

您可能會對以下博文感興趣:

購物及藝術在紐約	大加納利島	新西蘭南島	格陵蘭海上極光

Copyright © 2017 by Venus. All rights reserved.