Day 11 南極第二站上篇──布朗海崖Brown Bluff

**南美、南極篇使用粵語

雖然Day 11只有一次登岸，但相片太多，所以分開兩篇。今篇記當日朝早Brown Bluff嘅登岸；下篇貼下晝喺甲板上影嘅Antarctic Sound同Weddell Sea嘅海上風光。

上圖藍色箭咀係郵輪嘅方向，由昨日嘅登岸點Half Moon Island行緊去今日嘅登岸點Brown Bluff。

七點幾起身食早餐，唔知係咪郵輪上嘅香蕉所剩無幾，由之前完整嘅一條變成一小段，呢截有冇四份一？！

食飽上甲板望望，開始見到南極半島。

前方圓圓哋、平平哋座山，就係登岸點Brown Bluff所在嘅Tabarin Peninsula。

見到Brown Bluff喇，Brown Bluff係一個basalt tuya，世間罕有，喺岩漿噴發嘅同時要被厚冰川覆蓋先可以形成呢種獨特嘅山形地貌。

郵輪冇耐就anchor，見到工作人員放艇試水同搬物資，於是影多陣就落番房換衫準備登岸。好開心，係難得嘅好天色！

登岸喇

呢個天色、背景同迎面而嚟嘅企鵝，第一眼見到嘅時候呆咗，好肯定從來冇見過靚成咁嘅景象，既震撼又感動！

Brown Bluff有兩種企鵝，分別係Adélie penguins阿德利企鵝（下圖）同gentoo penguins巴布亞企鵝（下下圖）。兩種企鵝點分呢？醜樣啲，冇咁多顏色嘅就係阿德利企鵝喇！

呢堆懶嘢好得意，攤晒喺度曬太陽，佢哋係巴布亞企鵝B。肥肥哋，啲絨毛好軟綿綿咁，實在係忍耐力嘅考驗，好想摸呀！！！！！！仲幻想到攞個竹籮執晒佢哋返香港！呵呵！

成年嘅巴布亞企鵝Gentoo Penguin，眼上方有笪白色，個嘴紅色，比阿德利企鵝多色彩。巴布亞企鵝亦都係企鵝家族中游水最快嘅！

阿德利企鵝以黑色為主，有個白眼圈，呢個時候有啲Ｂ甩緊絨毛。

巧驚驚，支鏡好危險，唔知有冇蓋番鏡頭蓋呢？！如果俾隻企鵝B錫啖鏡頭就慘囉 >.<

一齊睇吓阿德利企鵝Ｂ有幾得意 ^0^

咦，石灘上瞓咗隻Weddell seal，企鵝同海豹齊齊曬太陽 ^^

連一向只對數字敏感，對美景卻毫無感覺嘅老公都落力影相。究竟係南極嘅魅力定係企鵝嘅魅力？

Volcanic tephra，唔知點譯，總知係火山爆發噴發出嚟嘅物質形成嘅。

唔少郵輪朋友行咗上山，好堅呀，咁斜！老公問我行唔行，睇嚟行上去都係望番呢個景啫，都係留喺石灘算喇，一樣影得開心 ^0^

Brown Bluff一隅

影到差唔多時間就坐小艇返上郵輪，郵輪下晝會喺海上周圍兜吓，仲會兜去慕名已久嘅世外桃源Weddell Sea，待續..

到南極郵輪、阿根廷、巴西伊瓜蘇2016目錄頁

到「Venus遊世界」總目錄

您可能會對以下博文感興趣:

紐約曼哈頓中城	西班牙第一高峰	美國簽證	格陵蘭海上巧遇北極熊

Copyright © 2016 by Venus. All rights reserved.