2016年2月25日 星期四

南美、南極資訊


本篇使用粵語


今篇將會係粵語版嘅南美、南極資訊篇。原先想寫旅程後感,點知寫寫吓唔想寫,同埋唔想用書面語,咁就隨心啦,我諗睇我個blog嘅都係粵語人佔大多數。

南美、南極資訊


機票

國際機票嗰程唔詳講喇,都係喺expediaskyscanner之類嘅機票搜尋引擎搵咗個大概先,最後通常會去番睇中咗嘅嗰間航空公司嘅網站度買。提一提如果想揀American Airlines、聯合航空等等,總之要經美國嘅航班,就算唔離開禁區,純粹過境,仍然係要有美國簽證嘅。


國際航班一般都係飛去首都,所以要轉內陸機上郵輪或去其它城市,我哋今個旅程用過LANaerolineas,都係當地有規模嘅航空公司,可以直接用佢哋個網站訂票。

LAN個網站係行得比較暢順嘅,aerolineas個網本來已經用到有啲把火,更大劑係喺俾緊錢嘅關鍵時刻死埋!唉,即刻send咗個email去航空公司問,諗住唔會有人覆架喇,於是打埋去card centre問有冇transaction,但出乎意料喎,我打完去card centre冇耐就見到回貓,話個交易唔成功,於是重新book過,而第二次係順利嘅。

至於傳聞話南美啲內陸機會無啦啦取消或者超唔準時,咁可能我哋係旺季去,正值當地暑假,所以係順利兼且準時嘅。機艙環境嚟講,兩間都ok,唔殘舊嘅,aerolineas(上圖嘅Austral屬aerolineas旗下)個衛生狀況再好啲添,LAN係好貫徹唔抹枱嘅作風。

結論係兩間各有優勝嘅地方,可以用行李重量、航班時間或者價格嚟決定揀邊間。

旅遊時間

去得南極嘅時候一定係南極嘅夏天,大部份郵輪/船會喺11月至2月啟航,部份10月中開始有,亦有啲去到3月,當中最peak12月至1月,亦係南極正正炎夏嘅時候,但當然,話晒係極地,熱極都係徘徊喺0度附近。

我諗去南極都會順便留一留南美,但其實幾麻煩架,溫差好大,冬天、夏天衫全部要帶齊,我哋今次就經歷咗咁耐以嚟溫差最大嘅旅行。喺布宜諾斯艾利斯Buenos Aires就攝氏30度左右,飛咗上伊瓜蘇Iguazu日日35度以上,飛落南面烏斯懷亞Ushuaia10度,再落南極就0度左右,回程飛去荷蘭阿姆斯特丹時就變咗北半球嘅冬天,得零下幾度。由於我哋揀咗班有7個鐘轉機時間嘅諗住出市中心行吓,所以喺熱辣辣嘅Buenos Aires上機時都要攬住件厚衫。

如果唔想為溫差而煩惱,南美幅員咁廣,可以考慮直接喺首都轉飛南部,例如去El Calafate睇冰川,咁溫差就冇咁大。由於地點、路線有一萬個可能,大家應該可以tailor-made到最適合自己嘅旅程嘅。

各大城市天氣數據http://www.weatherbase.com/

Plan行程必用嘅好幫手:日出日落、時差、天氣資訊乜都有http://www.timeanddate.com/

南極郵輪種類及航線

種類
大型郵輪:載客量大,有啲可以載1500人,所以價錢平,三萬港幣已經有交易,但係冇得登岸,純粹路過影吓相,呢類郵輪求其喺啲外國郵輪網站就可以搵到,唔多講喇。

中型同小型:真係可以踏足南極,載客量大概200,有啲由科研船改成嘅可以細到只載幾十人。下方連結已經結集咗大部份中型同小型嘅船/飛機,大家可以慢慢睇、慢慢搵。

截圖出自同一連結

如果睇啱的話,未必需要幫襯呢間旅行社架,我係純粹因為佢個網頁做得清晰先提供呢條link俾大家。同埋仲有啲船公司冇俾呢間旅行社做代售,所以呢度唔係齊晒所有南極船架。如果搵唔啱心水,不妨再用搜尋引擎搵吓其它。

如果大家有睇開我個blogfb專頁,應該知道我係唔鍾意經agent嘅,所以我喺度搵咗心水船之後,佢網頁上只透露咗艘船個名架嘛,我會試search番間船公司出嚟。一來想比較吓原本間船公司嘅收費;二來睇吓有冇得直接同船公司交易,咁我唔洗擔心間旅行社嘅可靠性,又唔洗擔心佢哋之間有咩甩漏同出錯會影響到我嘅booking,直接同船公司deal肯定係最穩陣嘅,如果船公司接受信用卡付款仲正,因為我email問過呢間旅行社,佢哋只接受電匯。

航線
宜家啲航線愈嚟愈多花款,由幾日到超過一個月都有,所以冇可能講得晒。
或者我講番傳統路線啦,睇地圖。

圖中船標誌係代表大部份南極船嘅出發點,嗰度係阿根廷嘅烏斯懷亞Ushuaia,有世界盡頭之稱。有啲船會向地圖右方(即東面)航行,去福克蘭群島Falkland Islands(深綠色標示)同南喬治亞島South Georgia(淺綠色標示),然後經南設得蘭群島South Shetland Islands(橙色標示)/南極半島Antarctic Peninsula(白色陸地)回航。由於South Georgia航程遠,所以呢種日數會長啲。

大部份船係由UshuaiaDrake Passage(紅色閃電標誌)去南設得蘭群島(橙色標示)同南極半島(白色陸地),然後沿南極半島南下,大部份唔入南極圈嘅去到64度咁上下就回航,而揀入南極圈嘅就去得南啲,但一般唔會保證去到幾多度,只係包入到南極圈(66°33'46),到時視乎天氣同海冰情況。

好喇,怕暈浪嘅其實係可以坐飛機架,可以揀來回都搭飛機、去程飛機回程船或vice versa。點行法呢,又睇地圖。


飛機標誌係出發點,嗰度係智利嘅蓬塔阿雷納斯Punta Arenas。然後上飛機飛去南設得蘭群島(橙色標示)入面嘅King George Island,然後落機轉船玩南極半島。簡單啲講,用飛機嚟慳時間同避開危險嘅Drake Passage,適合怕暈浪嘅旅客,但當然,價格就再高一啲喇。亦有資料提到搭飛機嘅缺點,就係變數會大過搭船,船絕大多數能夠如期出發、如期回航,但風太大就會影響飛機升降,所以行程唔好pack得太密咁話。


路線好多講唔晒,講埋地圖中我mark咗黃色心心嗰個位就算喇!嗰度叫Weddell Sea,比較少船行嗰邊。我鏡頭下影得唔夠靚,實景係好動人架,去南極的話不妨揀會行Weddell Sea嘅航線。置頂張相同上下兩圖都喺Weddell Sea影。


中船好定細船好?
個人喜好,中船就多啲公共空間走吓,設備好啲,唔洗日日困喺房入面。同埋架船大啲,船身會定啲,我就係搭中船,200幾個乘客,覺得算穩定,但缺點係客多,登岸要輪候耐啲。

德雷克海峽Drake Passage有幾得人驚?
客觀資料係德雷克海峽位處西風帶,以風高浪急聞名,係世界上最危險嘅航道之一,但亦都係通往南極最短嘅航線喎。進、出南極各需兩日時間,即係來回合共要喺海度熬四日!我哋呢趟旅程算係風平浪靜,情況比較差嘅時候都只係遇到68米浪,即係大約兩至三層樓高。如果不太易暈浪嘅話,從玻璃向外望,可以睇到水平線不斷高高低低咁改變,成隻船跟住啲浪起伏,都幾好睇嘅。

講吓經歷,我哋瞓之前會將枱上面啲嘢,例如相機、手機擺晒去地上嘅安全位置先,免得夜晚被浪咗落地跌爛。有睇過有啲bloggers話會成個人瞓瞓吓飛咗落地,所以啲嘢唔好擺喺床側邊個地度,免得俾自己責爛。今次啲風浪真係唔算勁,比上次喺格陵蘭海仲平靜,至少夜晚冇飛咗半個人出床,上次係瞓瞓吓架船突然傾斜,成個人向床尾方向飛出去,好在只係褪咗半個人出床,冇成個人飛落地。其實我預咗今次個情況會再差啲,點知仲ok過上次,只係每晚被浪醒兩三次,所以我覺得Drake Passage唔係咁得人驚。

治安及交通
南極郵輪當然唔洗擔心治安問題,安全到見過新macbook隨處放冇人看管,仲要係金色好靚好養眼嗰部。
南美治安就擔心咗好耐,唔睇猶自可,喺網上愈睇得多愈驚,所以我都係揀番以旅遊為主嘅城市停留,避免喺首都/大城市留咁耐,以減低風險。


至於Buenos Aires嘅治安,感覺上還可以,之前喺facebook專頁提過街上會有人埋身問唱唔唱錢,咁有人埋身就要提高警覺。觀察所得市面情況同地鐵情況都ok,但註明先我哋只敢行旅遊區同高尚區,同埋會check日落時間,恪守入夜前要番到酒店嘅法則,就算去安全地方我哋都會盡量咁做。

至於交通方面,無論喺IguazuBuenos Aires都主要係透過酒店call車或者幫襯出租車公司,買佢哋嘅接送服務,因為擔心隨手截的會誤上賊車同埋驚同個司機溝通唔到,當地係講西班牙文嘅。


阿根廷嘅出租車公司發展得好蓬勃,喺機場或市內商場會見到好多間,櫃位職員識少少英文,我通常會逐間埋去格價,揀啱就碌咭或俾現金,然後喺counter等個司機嚟pick upcounter職員會同個司機講目的地。
至於喺酒店出發就更方便喇,由酒店幫手
call車或call的,都係定額收費,安全又唔驚落車要拗數。但就感受唔到自行截的係咪安全,同埋兩者收費邊種化算喇!

Buenos Aires,可以認住下面條link入面隻獅子,呢間係當地歷史悠久嘅出租車公司,網上好評居多,如果差價唔大,不妨考慮呢間先。

裝備
南極郵輪
止暈丸、手帶、耳貼之類:視乎搭唔搭得船,準備定足夠數量。
防水外套、防水褲:極地天氣不穩,隨時落雨落雪,同埋wet landing有機會整濕條褲。
水靴:亦都因為wet landing嘅關係,需要以水靴登岸,如果船公司冇提供就要自己準備喇。
防水袋:坐小艇登岸嘅時候,相機有可能被水花彈濕,所以我哋買咗防水袋入住部相機。


防曬措施、大太陽眼鏡:南極雪地多,折射好犀利。太陽眼鏡要戴大啲,甚至用滑雪鏡仲好。因為今次我同老公就咁用番副全視線近視鏡,諗住由佢自己變色唔洗另外帶多副咁煩,上次北極個trip係夠用架。但今次我同老公都覺得對眼有啲唔舒服,因為個鏡片太細,折射太強喇!

南美
夏天衫?冬天衫?:之前提過南美地大,南美北部、南部、高山地區等嘅溫差出入好大,出發前要check天氣,唔好帶錯衫。
各式各樣嘅防曬用品:個太陽真係好勁,搽咗防曬兼戴埋帽、用埋遮仍然係曬到好燶,覺得塊面同對手曬到深色過薑餅人!其實所有防曬措施已經做齊,都唔知再可以做啲乜喇,總之最高級別嘅防曬啦!
防盜腰包:南美大城市治安出名差,財不可露眼,建議大額紙幣、信用卡、手提電話等放入防盜腰包。我諗大家最擔心唔見passport,我直情放喺酒店唔帶出街(但如果打算唱錢,必須帶備passport)。
酒店資料:由於言語不通,喺香港印好晒啲酒店confirmation,有晒地址,甚至地圖,就算隨手截的都唔驚去錯地方。


好長篇添,下篇未決定寫感想定係完埋之前嘅Three Arctic Lands,就隨心啦!


南美、南極目錄


「Venus遊世界」總目錄


您可能會對以下博文感興趣:
marina bay sands 德國 紐西蘭南島 格陵蘭
新加坡濱海灣金沙酒店
德國鐵路遊
新西蘭南島
冰島、格陵蘭、斯瓦爾巴郵輪極光


Copyright © 2016 by Venus. All rights reserved.

30 則留言:

  1. 我病左一個星期有多,仍未好返晒。又係攪到無心機寫野。

    回覆刪除
    回覆
    1. 保重呀, 多休息, 香港濕濕凍凍, 都幾寒吓, 注意保暖。
      唔洗急, 好番先啦, 我都愈嚟愈隨心

      刪除
    2. 2位多d休息呀! 唔返工都可以好忙架.

      刪除
    3. 謝謝小月關心^^ 我瞓得多, 已經好番好多lu
      嘻嘻, 係返工忙好多嘅, 成日multitasking, 宜家我每日只會俾一兩個task自己

      刪除
  2. 靜係睇呢篇都花了一些時間,諗下你仲要跟手PLAN埋個行程,真係人都癲呀!

    回覆刪除
    回覆
    1. 為咗旅行, 仲要係去自己想去嘅地方, 都好有動力嘅
      不過呢, 去先進地方的話, 啲網站通常做得好好, 最重要係plan好晒啲嘢, 訂嘅過程通常都係好暢順嘅, 呢啲地方就多啲枝節要處理囉, 有時甚至因為訂唔到要變陣, 係煩好多

      刪除
  3. 粵語寫我覺得生動傳神啲~~~~好睇!!
    喱篇info真係好齊好豐富,我諗如果有打算去喱幾處地方的都好值得仔細參考.....
    如果真正要出書就要諗諗編排啦,不過寫blog就可以free啲,隨心寫就最舒服,最緊要係你有時間寫,才可以感受到你嘅旅程和欣賞到靚相^^
    btw,病後復跑都唔可以太心急,有運動和能出汗基本已達目的

    回覆刪除
    回覆
    1. 多謝基爾嘅意見呀 ^0^
      一定隨心呀, 宜家連少少push自己星期日出blog嘅意欲都減低咗, 有一刻連自己都懷疑會唔會有一日停寫, 但到宜家為止, 係偏向想記低每個旅程, 不過幾時寫好就出。
      我好明顯係冇乜運動細胞, 真係急唔嚟, 都幾個月喇, 距離上係完全冇進展, 初時有少少雄心想發展到可以跑10km, 8km嗰啲, 宜家已經完全唔會咁諗, 當係keep番少少運動維持健康就算。

      刪除
  4. 人地係南美都掛住你黎留一留言
    番黎再過黎探你!

    回覆刪除
    回覆
    1. 耶, 小t真係好sweet, 我會等妳番嚟架, 玩得開心啲 :)

      刪除
  5. 回覆
    1. 嘩, 好在您再過嚟留言咋, 原來又跌咗落"垃圾留言"度 >.<

      刪除
  6. 怎會不記著你們呢? 話哂你們去到咁遠, 轉這般多程飛機, 又要在船上過很多日. 除了你, 還有小T去了南美.

    這些遠旅程是十分累人的, 你回來後懶了, 不是因為你懶, 而是因為太累了.

    我現在可能年紀不少了, 越來越怕去陌生的地方, 怕自己適應不到當地新環境, 體內未有當地人的抗體, 就容易生病了.

    回覆刪除
    回覆
    1. 謝謝掛念 ^0^
      係呀, 小t宜家應該喺復活島喇, 我等緊睇佢個旅程 :)
      您邊係年紀不少呢^^ 但我就覺得意志個影響力好大, 只要想去, 就可以適應到, 同埋宜家d通訊咁方便, 就算去到南極, 仍然覺得同家人/同大家都好近。如果另一半有假, 再長啲都仲得 ^^

      刪除
    2. 現在我搭16小時長途機回港,都已經全身散哂

      刪除
  7. 好詳盡既資料, 有時plan行程真係好苦惱, 不過去到見到咁靚, 什麼都值得.

    回覆刪除
    回覆
    1. Thanks :)
      同意呀, 只有自己知道自己想睇啲乜, 所以準備工夫都係要做同值得做嘅!

      刪除
  8. 好精彩詳盡嘅介紹! 我都唔鍾意經agent架!
    搭南極船有無送件大褸架?有見到有人有得送。
    Venus! 係烏蘇懷亞有無見有Last minute call ? 幾銀?

    回覆刪除
    回覆
    1. 多謝銀仔讚賞 :)
      有呀, 因為同北極個trip揀番同一間船公司, 所以件防水外套都一樣
      知道喺邊度買, 喺烏斯懷亞海旁啲屋仔度集合咗多間旅行社, 但其實喺fb page同website都接觸到呢啲last minute deal, 只係佢哋只係早大約半個月公佈, 都好急吓, 去到咁遠點夠時間安排。我舉個例啦, 剛見到個3月中嘅, 11日唔入南極圈, 5k美金, 係好抵

      刪除
    2. 唔該你呀! 睇嚟真係要辭工去南極才可以半價遊南極了⋯

      刪除
    3. 嘩, 咁又唔洗咁激, 如果隨時請到假, 唔洗要同事間遷就嘅都ok嘅, 我見你都好flexible, 唔洗book定酒店都得, 比起我呢啲過份穩陣派會容易成事

      刪除
    4. 我都係要辭工先可以玩耐d.

      刪除
    5. 我好少少,就係遲兩年退休可以玩耐D。

      刪除
    6. 1733 唔再留戀台灣,向世界出發呢!

      刪除
    7. 次次一聽到"退休"就會受刺激, 就會思考幾時先等到呢個好日子, 實在太令人羨慕!

      刪除
    8. 小月,唔係呀!我們仲係好喜歡去台灣架。舊年9月都有行程去架,但最後因為團友病左要取消晒所有訂好晒既野咋。

      今年我地仲好想去一轉台灣架。

      刪除
    9. Venus,我出來工作已經40年有多喇,都係時候退下來讓年青人接班了。

      刪除
    10. 好好享受人生! 您退休後可以喺個blog度帶我睇更多地方喇, 期待 ^0^

      刪除
  9. 哈哈,到時驚有時間但無錢玩嚕。

    回覆刪除