2016年8月1日 星期一

Day 4 巴西伊瓜蘇國家公園


**南美、南極篇將全部使用粵語


伊瓜蘇瀑布剛好喺阿根廷同巴西兩國之間,我哋睇完阿根廷嗰邊,呢日就過埋去巴西睇喇。第一次踏足南美,傳聞治安麻麻,又擔心陸路過境唔知順唔順利,於是就喺酒店join團過去,不過英文團full晒,只得西班牙文團有位,我哋照join啦,反正重點係過境順利同有人安排好晒交通,咁就可以安安全全咁完成旅程喇!


晨早六點幾起身食早餐,七點半喺酒店大堂等車嚟pick up


旅行社唔止做我哋間酒店生意,會先喺其它酒店接埋啲團友,都遲咗少少先嚟接我哋。佢哋啲logisticssmooth,先用van車到去邊境關口就落車交passport俾導遊,見上圖。然後轉搭下圖嘅大巴,大巴上面已經有部份團友喺度,等齊人之後就開去巴西嗰邊,個人係唔洗落車過關嘅。




白色衫嗰個就係我哋嘅導遊,辦緊過關手續。


過境喇,睇吓石壆嘅顏色,由阿根廷嘅藍白色變成巴西嘅綠黃色。


旅巴過咗巴西之後會停喺等候處等導遊辦完手續上車,跟住就向國家公園進發。由於巴西喺夏天會行日光節約,所以要將手錶校快一個鐘。


導遊好客氣,話佢啲英文麻麻,叫我哋盡量理解吓,其實我哋都覺得佢講得好唔錯,完全表達到。之後啲重要資料,佢都會用英文同我哋講一次,好似落車後叫啲團友去買飛,要買邊種,呢樣喺落車前已經同我哋講咗,咁我哋都識做嘅,一解散就快手快腳去買,集合又先到,等佢覺得我哋ok,唔洗特別擔心我哋。


巴西貨幣叫Real,我哋冇唱到,於是埋counter碌咭,每位BRL56.3(百零蚊港紙),最新價格可以click官網check,佢個官網全葡文,只有門票訂購有英文,現實得有啲搞笑,即係你唔洗知有乜睇,最重要係俾錢嚟睇 ^^


巴西國家公園地圖,取自官網


買完飛集合番,一齊上國家公園內嘅交通。



落車後又到講解時間,解散咗西班牙文團友後再同我哋講一次條路線。其實跟住係自由行,大概記一記有乜要睇同集合時間地點就得喇。


解散後有個觀景位可以望番過阿根廷,對面幢建築就係阿根廷伊瓜蘇國家公園內嘅唯一一間酒店。
















之前提過魔鬼之喉就喺阿根廷同巴西交界,呢個觀景位可以睇埋魔鬼之喉,不過就冇阿根廷嗰邊咁近喇,同埋啲水氣遮得好犀利,就算zoom近咗都睇唔清條瀑布。




跟住開始行步行徑








上咗橋之後,完全食晒Floriano瀑布強勁嘅水花,要轉用手機影相喇!




行到橋嘅盡頭係兩國交界嘅伊瓜蘇河,見到好靚嘅雙彩虹,亦可以遠望魔鬼之喉。









行完條橋,件衫同頭髮都滴得水出,濕得好誇張,好在相機袋防水。



跟住上Naipi Square個觀景台,可以近距離側望Floriano瀑布。




呢度亦都有架𨋢Floriano瀑布頂個觀景台,排隊嘅時候有浣熊相伴,正正喺條隊隔鄰,只要伸手就摸到,見佢既肥美又可愛,真係好想摸,不過啲爪好尖,都係忍吓,唯有狂影相啦!





睇吓幾肥,一定好軟綿綿,得意到暈。



做乜個樣咁慘慘豬,我哋唔餵得你架,野生動物要自己搵食架嘛!


條隊好長,終於排番入室內喇!


企喺園內最高嘅觀景台,望番剛才嗰條濕身橋,仲有彩虹添!








離開Naipi Square後向集合處進發。我哋只係早咗啲啲,但已經屬於最早嗰批,得幾個團友到咗,咁唔好嘥時間,向導遊報咗到之後行埋間舖同喺附近影吓相。









或者跟團就係咁,總有人遲到嘅,最終導遊要去搵人,過咗成半個鐘終於可以搭番園內嘅交通回程。


喺國家公園門口影影相就上番旅行社架旅巴。





個團有得去埋免稅店嘅,以為下一站係免稅店啦,原來係侷食lunch,團費冇包嘅,食飽後直接喺餐廳找數,好在間餐廳收美金,我哋根本冇唱過巴西錢。自助餐價錢唔貴,只係唔好食。




跟住去免稅店,幾大幾靚,不過室內唔影得相。




預早少少出嚟搵番架旅遊巴,當時正刮起風沙,個天變成橙紅色,風沙撲面,吹到塊面有啲痛,好沙漠嘅感覺,乜伊瓜蘇唔係亞熱帶雨林氣候咩?!



上車坐咗一陣,導遊叫番我哋同一對墨西哥夫婦落車,截咗架的士俾我哋返酒店,我諗因為酒店位置要行小路先到,旅巴咁大架入唔到,所以有咁樣嘅安排。


好在過關順利,人都係唔洗落車過關嘅,然後先放低住隔鄰酒店對夫婦,我哋最後落車,下晝三點幾就完成巴西伊瓜蘇半日遊喇!個人覺得阿根廷嗰邊範圍大啲,可以靠近瀑布啲又靚啲,要預全日或大半日;巴西呢邊喺有比較下會遜色少少,半日就夠。

返房沖完涼後,老公問去唔去番Puerto IguazuTriple Frontier景點,可以叫架的士來回,er..沖完涼真係唔願郁喎!跟住老公話預咗我係咁,然後喺度得戚自爆:話昨日喺酒店call車去阿根廷伊瓜蘇時,佢係有諗過回程要安排車嘅,不過唔想限時限刻計住時間嚟行,又想侷我出市中心,於是冇提我要安排埋回程嘅車。激死,仲好膽講番出嚟!好在喺市中心冇遇到壞人,隨手截的又冇誤上賊車咋,呢啲咪叫唔識死囉,明明記得都唔提!

翌日將會飛返阿根廷首都Buenos Aires


南極郵輪、阿根廷、巴西伊瓜蘇2016目錄頁

「Venus遊世界」總目錄


您可能會對以下博文感興趣:
加拿大白馬 馬德里 wanaka 極光
加拿大白馬周邊
西班牙馬德里
新西蘭南島
格陵蘭海上極光

16 則留言:

  1. 好野~~我第一~~~
    真係企到超近睇~~~但講真我覺得阿根廷哥邊靚d~~~~~
    同埋跟團真心唔錯!!!安排好哂交通唔使煩!!!!!!俾我都會跟團~~~~~~

    回覆刪除
    回覆
    1. 係呀, 第1, yeah ^0^
      我都覺呀, 阿根廷嗰邊係大啲靚啲
      係囉, 驚上賊車, 傳聞巴西治安差過阿根廷, 所以跟團穩陣

      刪除
    2. 阿根廷哥邊叫氣勢!!!!!!!!!!但坐船仔係巴西哥邊先有?
      你叻呀!!我寧願俾多少少錢!!一黎唔使煩..同埋有團有導遊感覺安全d!

      刪除
    3. 係呀, 氣勢!
      阿根廷嗰邊有得衝瀑布
      係, 安全最重要!

      刪除
  2. 影到雙彩虹+瀑布好靚呀! 難得去到點都要兩邊都去晒先得既~

    回覆刪除
    回覆
    1. 係呀, 我都覺得一場去到又夠時間的話應該兩邊睇晒
      全靠天色咁靚, 景物都靚晒

      刪除
  3. Double rainbow all the time woo. 個導遊都幾好, 起碼講到英文. 如果唔係就連集合時間都唔聽唔明, 會錯過左.

    回覆刪除
    回覆
    1. 都keep咗一段時間有雙彩虹 ^^
      好呀, 我冇expect佢會講到! 真係講唔到都合理啦, 我哋join西班牙文團架嘛。之前擔心溝通唔到, 出門口時喺酒店枱頭拎定memo紙, 諗住佢連英文數字都唔識講的話就用阿拉伯數字寫低時間或者俾佢畫地圖用, 點知乜都唔洗添

      刪除
  4. 我見兩邊都好靚,仲有彩虹,水量好勁,上下兩層水超壯觀,
    魔鬼之喉...名不虛傳,四面八方注水入去。
    妳身先阿根廷方便啲,跟團過境去巴西煩啲啫,導遊都跟得好足,安排唔錯。

    回覆刪除
    回覆
    1. 係架, 兩邊都靚, 魔鬼之喉超有氣勢
      個導遊直情超出所想, 所以我哋啲團費都俾鬆手咗

      刪除
  5. Venus 位先生好攪鬼噃,睇到我笑左出嚟~
    果條步行徑我都濕透,當年仲用左部大機影左幾張,好在無壞啫。。。

    回覆刪除
    回覆
    1. >.<
      我見唔對路即刻收番入相機袋, 不過勁曬, 濕咗都好快乾

      刪除
  6. 巴西那邊都值得去!可能學了葡萄牙語更好。

    回覆刪除
    回覆
    1. 值得呀, 巴面呢邊睇Floriano瀑布好靚!
      語言愈識得多愈好 ^^

      刪除
  7. 阿根廷果邊真係近啲震撼啲喎,巴西喱邊就睇到個大環境!
    如果過境方便啲又真係跟tour好啲,好彩個導遊都幾好,肯用英文講多次你地知啲重要注意事項,反正都係自由去逛,咁跟西班牙文團同英文團都分別不大.....

    回覆刪除
    回覆
    1. 如果飛去的話, 好有信心會過境順利, 始終陸路關卡少見特區護照, 所以都係跟團穩陣, 阿導遊都話未見過, 問我哋係咪免簽, 不過可能因為佢係跟西班牙文團啦 ^^
      佢識講直情係bonus, 真係分別不大

      刪除