2016年9月11日 星期日

Day 12 南極第三站上篇──長城站Great Wall Station


**南美、南極篇使用粵語

近中秋都幾難忍口,親戚朋友聚會食食食,再加各式月餅,本身已經係為食底,對節日食物嘅抵抗能力仲特別低,日日都四份一傳統月餅+四份一至半個奶黃月餅+四份一冰皮月餅,咁食法真係唔掂,下年唔買!唔買!唔買!!唔買就唔洗食!今年都話咗唔買,點解總係要買 >.<



續南極遊記

朝早7點幾起身食早餐,食飽飽即刻返房換衫,呢日會有兩次登岸,所以好早就land第一次,今次輪到Group 3先,我哋係Group 4,朝早9點已經坐咗喺快艇上面喇!



協助乘客上落快艇同揸快艇嘅船員多數係菲律賓籍嘅,部份係越南籍,佢哋都幾多功能架,當中英文比較好嘅會喺餐廳做埋侍應,而多才多藝嘅會喺郵輪上嘅節目度表演。


到喇!中國喺南極嘅其中一個科研站──長城站Great Wall Station,位置喺South Shetland Islands嘅最大島嶼King George Island


日程表形容呢次登岸係rare landing,因為長城站好少接受咁大批遊客參觀。主要係因為我哋架郵輪上有十幾個內地嘅青少年科學家,佢哋其中一個任務就係去長城站同啲科研人員交流,所以長城站先順便俾埋全船乘客登岸參觀。


長城站係中國嘅首個南極科研站,早喺85年落成啟用。中國喺南極仲有另外三個科研站,當中以崑崙站最令我嚮往,崑崙站係南極地區海拔最高嘅科研站,建喺南極冰蓋嘅最高點,海拔高逾4000米,真係諗吓都覺得型,而且佢嘅位置入咗南緯80度,對於一向對緯度好有追求嘅我,真係好希望將來有機會踏足吓。


圖片出自維基百科


嘩,有香港個牌呀!南極長城站距香港15537km


















然後周圍行吓,當中有部份建築可以入內參觀。




















跟住去長城灣行吓,風和日麗加上微風相伴,好寫意呀。



臨走前去番小型展館度睇吓有咩買,點知我唔知價又冇問價就話要買兩張長城站證書,到寫好晒名先知兩張要40蚊美金,最樣衰係我冇帶咁多錢落船,雖然對方最後自動減價幫忙解窘,但真係超唔好意思   >.<





行夠就返上郵輪,換番衫後再上甲板影吓相,發現有半個天變得灰灰暗暗,好在我哋今次早登岸,把握到最靚嘅藍天白雲時刻。












下篇係下晝嘅landing,地點係Deception IslandWhalers Bay


南極郵輪、阿根廷、巴西伊瓜蘇2016目錄頁

「Venus遊世界」總目錄


您可能會對以下博文感興趣:
新西蘭南島 centara ras fushi 格陵蘭 極光城
新西蘭南島
馬爾代夫美食篇
格陵蘭海上再遇北極熊
挪威極光城特羅姆瑟

Copyright © 2016 by Venus. All rights reserved.

24 則留言:

  1. 係咪通常夏天先有人駐守,冬天就無人?
    室內果啲植物係研究員自己種的菜?
    崑崙站真係好接近南極洲正中心,我諗要坐飛機先去到....
    月餅就食咗先算啦^^

    回覆刪除
    回覆
    1. 係呀, 有啲站冬天無人, 例如崑崙站, 因為冬天可以凍到零下90度
      長城站冬天都有科學家喺度, 不過人數會少過夏天
      係呀係呀, 佢哋之前喺溫室成功種過辣椒, 宜家種蔬菜, 咁喺南極都有新鮮蔬菜食, 真係估唔到喺南極都有新鮮嘢食 ^^
      要喇要喇, 好遠水路, 南緯80度加4000米高, 真係極度吸引, 好想好想好想去, 但睇嚟只能發吓夢喇!
      話唔食又忍唔住日日食 >.<

      刪除
    2. 零下90度實在太誇張了~~~~@@
      要食返啲生果balance返囉^^

      刪除
    3. 係呀, 已經超出咗可以想像嘅凍嘅程度
      賣飛佛, 有食有食 ^.*

      刪除
  2. 入中國站使唔使出示回鄉証?
    原來中國建有咁多個站,站內無乜人?
    我八卦想睇張證書,值40蚊美金。
    月餅要食架,我都食咗少少地喇。

    回覆刪除
    回覆
    1. 唔洗唔洗, 南極屬於每個人 ^^
      中國嗰幾個站都有科研人員, 係得崑崙站冬天冇人。其實有唔少國家啲科研站已經荒廢, 或者等到個國家有錢先派番人去, 而中國嗰啲就運作得好好, 睇得到中國嘅國力同財政都好強 :)
      唔靚架, 好普通一張紙, 不過有晒站內科研人員嘅簽名。之前喺fb專頁post過同講過呢個冇錢俾嘅羞家故事, 所以呢度冇再詳講。難得路霸兄有興趣睇, 我遲啲post番張證書上嚟 ^.*
      好鍾意食月餅, 都係忍唔到架喇 >.<

      刪除
  3. 唔知點解黎到長城站無左南極feel~~~~~
    不過我諗我去到都會買哥張證書....
    失敗在....真係唔記得帶錢~
    但又點知有野可買~~~~~~~~~~~~~~~~~~~
    咁你寄信哥個係邊個站呀?
    月餅真係要睇住食呀!!!好鬼甜

    回覆刪除
    回覆
    1. 因為冇企鵝?! ^^
      唔..如果我知價的話應該唔會買喇, 我預算幾十蚊港紙一張架咋 >.< 除非每個南極嘅登岸點都有證書賣, 咁就有動力去儲齊佢, 但當多數站都冇證書賣時, 就變得可有可無。
      其實知有嘢可以買嘅, 之前嗰日個行程講座有講, 但冇預算自己會有嘢想買囉, 真係樣衰呀, 寫晒名先知唔夠錢俾, 好似呃人張證書咁 >.<
      嗰度係port lockroy(英國嘅base)同Akademik Vernadsky(Ukraine嘅base)
      好鍾意食甜嘢, 所以好鍾意食月餅, 都係忍唔到完全唔食架喇, 唯有盡量控制吓個量 >.<

      刪除
    2. 可能係~~同埋雪都無乜~~
      都唔係呀!!!!有張證書去過下南極嘛!!!!!哥d挪威北角又有證書...葡國又話歐洲最南又有證書.....你哥張直頭係成個地球既南面添啦~~型爆~~~
      我又覺得佢應該寫之前同你講講幾錢先岩喎....講真個個登岸都唔會帶咁多錢架啦~~~~~~
      好羨慕你有從南極寄來的信件!!!!!
      乖啦~食少d啦~錫哂~
      祝你有一個快樂的中秋節~人月兩團圓~~~

      刪除
    3. 因為郵輪會印張入咗南極圈嘅俾我哋, 所以呢張唔係最南, 不過長城站唔係經常俾人land, 所以有一定價值嘅。不過如果有問價的話, 我知自己帶唔夠錢就一定唔買, 宜家唔知人哋會唔會覺得我用非常手段迫人減價, 總之超勁肉酸 >.<
      係嘅, 對方都有責任, 錫晒小T呀, 佢又冇講, 我又冇問。後來我知道價錢後睇到枱面原來有個好細嘅價錢牌, 不過枱面show咗幾樣手信, 之前啲人喺枱上買賣又推開咗個牌。
      小t好快都有喇 ^.*
      嘻嘻, 都係日日食, 期望快啲食晒就唔洗再食喇! 呢啲節日嘢一年一次, 好難抗拒 >.<
      多謝! 我都祝妳中秋節快樂, 人月兩圓 ^0^

      刪除
  4. 我以前都好鍾意食冰皮,最愛蛋黃綠豆蓉,已經戒買左3年喇。
    不過呢兩年自己去整傳統月餅,蛋黃豆沙/蓮容,迷你版都一整隻蛋黃,一日吞一隻。
    過兩日仲有屋企人公司送的奶皇,每年中秋前後都係重災區呀。

    回覆刪除
    回覆
    1. 嘩, 我啲廚藝係bb班, 連月餅都識整, 我覺得妳好叻呀! 個黃真係好正, 月餅又好, 糉又好, 都係最鍾意食黃。自己整會健康啲, 起碼知道餡嘅成份, 不過一日一黃真係多咗啲, 不如下年試吓減到半隻。冰皮都戒咗, 相信妳可以減黃 ^.*
      完全理解, 搞掂咗自己嗰啲, 仲有嚟自四方八面嘅 >.<

      刪除
    2. 我係柴娃娃學人玩下架咋,絕對唔係另呀!
      舊年就係整左半黃,覺得漏左 d 油份,所以今年唔切開個黃,做全黃囉~~
      我細個唔食黃架,會挑走 d 黃,淨食蓮蓉,而家口味轉左啦,人老啦,哈哈哈~~

      刪除
    3. 係噃, 冇諗會有漏油嘅問題添
      竟然?! 我覺得黃先係最正嗰部份呀! 細個已經好鍾意食, 成日將個黃留到最後先食 ^^

      刪除
    4. 多謝Donna, 中秋節快樂呀 ^.*

      刪除
  5. 長城站唔容易去喎!你張證書有冇編號o架?

    回覆刪除
    回覆
    1. 都係, 唔係經常俾land
      冇呀, 有編號的話會比較值得

      刪除
  6. 回覆
    1. 多謝路霸兄, 中秋節快樂, 人月兩圓呀 ^^

      刪除
  7. 端午節不吃粽子,中秋節不吃月餅,新年不吃年糕,好似沒有放過假喎!
    我都想去長城站!

    回覆刪除
    回覆
    1. 咁又係, 三樣我都好鍾意! 同埋節日嘢食會覺得一年先一次珍貴啲, 所以好難忍口
      plan吓好快成事 ^.*

      刪除
  8. 崑崙站應該極度與世隔絕,科研人員咪好艱苦?
    $40美金一張?果然有我們中國人做生意的頭腦。

    回覆刪除
    回覆
    1. 係呀, 亦只有愈與世隔絕先愈令人嚮往! 相信都係喇, 但一世人難得嘅機會, 應該實有人願意做。
      唔係唔係, 20蚊美金一張, 我唔知價就話買兩張, 所以搞咗個40蚊出嚟

      刪除