Day 11 南極第二站下篇──世外桃源Weddell Sea

完成Brown Bluff嘅登岸後去餐廳食lunch，靜靜哋冇乜人，可能因為今日輪到Group 2先登岸，我哋係Group 4，屬於早嗰批，所以玩完上番郵輪都冇乜人返到。

飯後差唔多長留甲板，天色實在太靚喇，襯到啲冰都特別靚，唔睇會好嘥！

下圖嚟自Hurtigruten送俾乘客嘅光碟資料，右下角係Day 11嘅航線，Brown Bluff呢個登岸點位處Antarctic Sound南極海峽，完成登岸活動後會由Antarctic Sound駛去Weddell Sea威德爾海。然後喺Day 12回航返去South Shetland Islands，參觀中國南極長城科研站Great  Wall Station。

先睇埋Antarctic Sound嘅景先

跟住郵輪會駛入Weddell Sea，據講Weddell Sea更人跡罕至、更世外桃源。嚟個圖解先，因為唔少郵輪喺過咗South Shetland Islands之後會好似下圖綠色箭咀嘅方向咁沿南極半島南下，比較少行另一邊去Weddell Sea。

 Weddell Sea有部份海域長年冰封，亦都被科學家證實擁有世界上最清澈嘅海水。我覺得"最清澈"之名Weddell Sea真係當之無愧，因為唔洗睇個mon，單憑肉眼已經知道入咗Weddell Sea，睇吓，海水變得更平靜、更細緻。

記得入到Weddell Sea嘅時候，喺度諗呢個究竟係咩地方，點解可以靚得咁交關！不過啲相反映唔到實景嗰種靚，我亦都無法用語言、文字去形容。醒起方東昇喺世界零距離講過嘅金句：「美景當前，任何語言、文字、圖片都顯得蒼白無力！」

話時話，究竟大台幾時先肯將世界零距離III合番做半個鐘一集，等咗好耐喇，宜家碎濕濕咁每次播得嗰幾分鐘真係冇心機睇囉！

喺甲板吹咗幾個鐘，凍到意志力驟降，走咗去沖杯熱朱古力，搭Fram的話記住用4樓茶水間部熱朱古力機，真係好香、好濃、好好味！飲完勁有罪惡感，拿拿林上番甲板再影過，順便等低溫幫手消耗番體內杯熱朱古力出嚟！

咦，水面有啲唔尋常嘅黑影水紋，冇耐就意識到係鯨魚嚟嘅，跟住船上都有廣播話發現鯨蹤。

好易認，係殺人鯨killer whales呀，有尖鰭同見到黑白色。

另外仲見到幾次企鵝游水，但佢哋好高速，反應得嚟已經唔知去咗邊，今次只係影到一張咋，仲要未zoom近 >.< 一路到郵輪旅程尾聲先再影到張近啲、清楚啲嘅。

下晝五點幾去聽翌日行程講座

跟住再上甲板影過，我都覺得自己好癲，雖然好好陽光，但係當時得兩度咋。總之好天色難求，尤其喺變幻莫測嘅極地，所以有就要珍惜，影盡每分每秒！

係喎，有開心嘢要記低，大家都見我乜景都話靚架嘛，所以多數係得我一個喺甲板影相架咋，咁呢，有啲郵輪朋友見我咁癲，上親甲板幾乎都會見到我就過嚟傾幾句，閒聊幾句好平常啫，完全唔覺得係咩一回事。點知到呢次郵輪嘅尾聲，即個幾星期後嘅某日、某層甲板度，嗰次我又啱啱同個郵輪朋友傾完偈，老公就突然間閃埋我身邊話：「條友都幾黐妳喎，成日見佢撩妳傾偈！」嘩，呢嘢真係忍唔到笑，醋味好濃喎！成日覺得自己獨自一個喺甲板影相有啲孤獨冇人理，咁靚嘅景又冇人陪睇，原來唔係架，老公係會離遠睇住我架，被重視嘅感覺真好，開心得嚟又有少少感動。

六點幾去餐廳食晚飯，食飽飽再上甲板影過。

到晚上八點幾，郵輪上有廣播話會停駛一陣，等大家影吓企鵝棲息地Madder Cliffs。嘩，真係好誇張、好壯觀呀，據講呢度有過萬隻阿德利企鵝。

影完企鵝就返房沖涼同抖抖，等接近日落再影過。喺二月初南極嘅夏天，夜晚九點幾先日落，紫色嘅天空好迷人。

夜晚十點有廣播話七樓甲板有挪威特色美食，我哋都有去試試，不過味道麻麻。跟手影多陣日落，覺得寒風刺骨到頂唔順就返番入船艙喇。

呢日雖然得一次Brown Bluff嘅登岸，但真係好豐富、好滿足！

到南極郵輪、阿根廷、巴西伊瓜蘇2016目錄頁

您可能會對以下博文感興趣:

新西蘭南島	西班牙第一高峰	冰島西北部峽灣區	挪威極光城特羅姆瑟

Copyright © 2016 by Venus. All rights reserved.