2016年8月21日 星期日

Day 9-10 南極之旅首站──半月島Half Moon Island


**南美、南極篇使用粵語


一返工即領嘢,星期五晚喉嚨劇痛兼鼻水長流,搞到星期六唔敢出街乖乖哋喺屋企休息。今日精神番啲,不過把聲變晒,仲有啲咳,睇嚟聽日要做口罩人,轉頭搵番啲lens出嚟,否則會成副眼鏡蒸到朦晒 >.<


 終於寫到南極喇,會勁多相,好想好想留住南極嘅每一刻!


郵輪喺Day 8下晝六點離開Ushuaia後會一直喺海上航行,越過有世界上最危險海域之稱嘅德雷克海峽Drake Passage,到Day 10下午先會首次見到陸地,嗰度係南設得蘭群島South Shetland Islands,我哋第1個登岸點就係South Shetland入面嘅其中一個小島,叫做半月島Half Moon Island,呢度係未到南極大陸嘅


地圖出自http://www.wikiwand.com/en/South_Shetland_Islands

之前都提過,今次嘅Drake Passage算係"風平浪靜",冇遇到超過10米嘅巨浪,據船上廣播,比較差嘅時候都只係6-8米浪,不過聽到Drake Passage呢個大名真係唔敢怠慢,有食定止暈丸,除咗船身不穩行唔到直線同唔敢出甲板,身體狀況好ok


旅程嘅第9日,早餐後去拎Expedition jacket,上次著XS,覺得唔著羽絨喺入面好大件,著埋羽絨再外披jacket又唔好睇,今次直情攞XXS,好開心 (^0^)v


9:30am聽咗陣講座,講題係Amundsen and the Belgica,講阿Amundsen喺百幾年前坐住Belgica呢艘蒸氣船去南極探險,但個講者唔熟書,又講得悶,冇聽晒就走。


11:00am個講座係介紹船上自費活動嘅,其實我唔認為自己嘅體能可以應付到啲活動,不過反正冇嘢做就去聽吓,點知講得幾吸引喎,有個喺南極瞓一晚嘅都幾有意思,但一聽到要自己起帳幕,即刻涼番一半。之後知道呢項好多人報名,要搞個公開抽籤。

望吓個mon,仲有好遠水路先到South Shetland。


跟住去食lunch,下晝3點有個MandatoryIAATO講座,講登岸嘅注意事項。


之後上7樓食tea睇吓浪

5點聽攝影師講座


晚餐終於唔係buffet,我鍾意呀 ^^



旅程嘅第10,好期待,呢日下晝有第一次landing



最鍾意食早餐,可以揀水果食,不過唔知食咁多會唔會果糖超標!老公嗰碟好似多元化啲。

早餐後去試Muck Boot,上次北極個trip見到有細size,所以今次唔自己帶喇,我個size要著童裝,唔好處係童裝嘅鞋筒比成人嗰啲短好多,如果wet landing時啲水深或者登岸點啲雪厚就會入水入雪。睇嚟我要跟講座咁講將條防水褲放出嚟 >.<  條褲放出嚟係包保唔入水唔入雪,不過100%保證成褲腳企鵝屎!唉,或者land嘅時候睇水深再決定!


聽講座前見到海面開始有嘢睇,海面亦比昨日平靜,可以出甲板喇,可惜天氣唔係咁好,都幾大霧!


跟住去聽講座,講題係Penguins: the brush-tailedlife and dead,呢場值得一聽。








之後開始見到海面有浮冰,於是著番羽絨出甲板影相。

Lunch time,老公嘅豐富午餐,佢恃住勤跑步好快減得番就食多咗嘢。我寧願就住食同揀嚟食,唔止因為怕肥,更加係為健康。

















繼續出甲板影冰,雖然天色麻麻,仲有啲霧未散,但已經好靚!望住呢個冰雪世界,有一種感動,係我夢寐以求嘅南極,終於到喇!


準備登岸嘅工夫,所有帶上岸嘅袋要吸塵,亦都唔可以帶膠袋上岸。


點半又聽講座,Penguins, strange birds of Gondwana,呢場係第一次有普通話翻譯,幾特別,因為內地嗰位expedition team member翻譯時會加埋佢自己嘅理解同知識入去。

睇吓個mon,已經到咗南設得蘭群島,航行緊去將要登岸嘅半月島。



















又出甲板影吓浮冰,冇耐聽到郵輪anchor,眼前就係半月島。島上有個阿根廷嘅基地──Teniente Camara station,之後郵輪放小艇落海試水,有啲緊張添,好快就首登南極喇!


喺甲板吹咗好耐風,要入室內暖吓身。





再出甲板影多陣就落返房換衫等登岸宣佈,今次我哋係Group 4,全船分8組



登岸喇!上次北極會孭埋袋,其實除咗房咭、相機、鏡頭抹布同紙巾,根本冇嘢需要用,於是今次淨係用防水袋入住部相機,其它幾樣嘢袋晒喺衫袋就出發喇。紙巾好緊要,因為必定吹到流鼻水!










一上岸即刻見到chinstrap penguin,果然個chin有條strap。好可愛呀,肥肥哋、傻傻哋咁嘅樣 ^^ Chinstrap penguin呢個品種,喺今次嘅cruise入面只有呢次登岸可以見到咁大數量。


咦,發現冒牌貨!見唔見呀?有隻條頸特別長架!呢隻係Antarctic Shag南極鸕鶿,佢混咗入幾隻Gentoo penguin度。

南極首站登岸,點都要亮吓相嘅,雖然著到好大隻咁 >.< 當時氣溫有零度以上,所以唔著羽絨喇,外套入面著咗三件防寒內衣加一件衛衣,防水褲入面仲有一厚一薄襪褲(薄嗰對主要係方便晚晚洗容易乾)。行起上嚟ok,唔算凍。


半月島Half Moon Island顧名思義呈半月形,陣間喺島上見到嘅冰川係隔鄰Livingston Island嘅。





















好喇,離開岸邊行入島喇!











有好多隻海獅Sea Lions,不過佢哋黑色一舊好難影,要就到某啲角度光線先睇到個樣。



























啲企鵝咁樣行山、行石法都幾辛苦!其實我都係講緊自己嘅感受,呢個登岸點被界定為冇難度,但講真我覺得啲石幾難行,同埋啲積雪位、積企鵝便便位係跣嘅,一個唔小心可能變成"周紳士"!





見到有綠色便便的話,即係企鵝搵唔到食。企鵝應該食鱗蝦、蝦或者魚,如果都捉唔到嚟食先會食海藻,咁便便就會呈綠色。






呢幾隻身上滿佈粉紅色便便喎,即係有批企鵝叻叻喇,捉到鱗蝦/蝦食。













對面Livingston Island啲冰川真係好靚,呢個時候天色仲開始好轉,但我哋差唔多要上番小艇喇!






走嘅時候見到藍天,今次遲登岸嘅groups幸運喇。





返上郵輪後再上甲板影多轉。







返房換完衫後個天再清朗咗,又上甲板影多轉。


晚飯時間










只要有嘢影就唔怕風、唔怕凍,郵輪過咗Drake passage後海面平靜晒,基本上可以長駐甲板。喺郵輪未廣播有鯨蹤前,我已經影到鯨魚噴水,可惜漸漸入夜,距離又遠影得唔清   >.<






有一邊海面起霧喇,不過見到嘛?上圖右方有三個噴水位,即係唔止一條鯨魚呀!


夜晚聽埋翌日行程簡介就返房睇相,雖然天色唔算好靚,但係極~度~滿~足!雄偉而純淨嘅冰雪世界加上憾動人心嘅可愛企鵝,世上仲有邊個地方可以更動人?!


南極郵輪、阿根廷、巴西伊瓜蘇2016目錄頁

「Venus遊世界」總目錄


您可能會對以下博文感興趣:
加拿大白馬 大加納利島 wanaka 極光
加拿大白馬周邊
大加納利島
新西蘭南島
格陵蘭海上極光

Copyright © 2016 by Venus. All rights reserved.

21 則留言:

  1. 回覆
    1. 我係比較搭得船嘅, 當覺得有啲暈就乜都唔做攤番上床, 咁就會ok番^^

      刪除
  2. 還想問你地上的粉紅和綠色係乜,好彩你有講解XXD
    這身藍色裝備都幾靚,襯返個天與海
    成個山坡企滿晒企鵝好壯觀
    咁多冰山仲有鯨魚睇,好開心

    回覆刪除
    回覆
    1. 唔寫低會唔記得嘛, 仲有白色便便即係企鵝食咗魚 ^^
      真係?! 至弊個cutting唔掂呢, 個膊位好闊 >.<
      係呀, 好壯觀!!!!!!
      冇錯呀, 其實淨係睇冰山已經好滿足, 宜家係超大滿足 ^^

      刪除
  3. 好開心有得睇喇!!!!!!!!咦...點解今次寫得咁快既~~~
    喂!!衰妹!!好好休息喎!!!飲多d水!!!!咁慘架一番工就唔舒服!
    南極呀!!!!係南極呀!!!!!!!好興奮!!!第一次登陸哥種感覺一定係超興奮超開心!!!!!!!
    期待之後的行程!!!!!我見到d冰已經好靚!!

    回覆刪除
    回覆
    1. er......好似都成個星期喇
      多謝關心呀, 今日已經進展到好咳吓, 睇嚟要睇吓醫生喇 >.<
      係架, 應該係好開心興奮架, 整體上我最享受喺甲板影相嘅時刻, 因為冇體能要求。之後有啲登岸點呢, 對於我幾有難度, 所以後來會夾雜一啲擔心, 驚自己應付唔嚟
      啲冰無敵靚, 真係無敵靚, 真係超級無敵靚!

      刪除
  4. 妳應該痊癒了,小心身體,好好保重!
    企鵝好可愛,但佢地周紳士,
    冰山好近影得好靚,
    用快艇上岸好刺激
    岸上喺咪好凍呀

    回覆刪除
    回覆
    1. 未好呀, 咳到甩肺>.< 好的, 謝謝路霸兄!
      係呀, 除咗剛喺海游完水上嚟嗰啲白雪雪, 其他都係周紳士, 但最神奇係周紳士都咁得人鍾意^^
      實景更靚
      都係, 吹甩頭
      始終係夏天, 唔算凍呀, 呢度有兩度, 遲啲落到南極大陸都有零下幾度至零度

      刪除
  5. 無錯!唔動人點叫"極"呢? 哈哈~ 南極,突然都好想去。
    原來痾綠色嘅係咁解,旅行真係可以學到好多野。

    回覆刪除
    回覆
    1. 唔知噃, 或者會有人唔鍾意極地風光
      極地, 我每分每秒都渴望再去
      好乖架, 有留心聽嘛

      刪除
  6. 當然,旅行可以增值自己,一定留心~ 多謝Venus 就真!

    回覆刪除
  7. 企鵝好可愛, 南極, 好吸引!! 看妳BLOG 止住渴!!!
    原來不同的便便就是吃了不同的食物,
    又增長知識了. THANK YOU!!

    回覆刪除
    回覆
    1. 我都係一路寫一路止住渴, 希望將來有機會再去
      唔好客氣, 我睇您個blog咪一樣係長知識 ^.*

      刪除
  8. 睇你地一登島時,一地粉紅色,唔知係乜野,仲想問添。而家唔洗問嚕。
    見到咁大群企鵝,會唔會聞到好大企鵝味呀?

    回覆刪除
    回覆
    1. 都有味呀, 企鵝啲便便味, 不過係可以接受嘅程度, 因為風超大, 吹散啲味道

      刪除
  9. 作者已經移除這則留言。

    回覆刪除
  10. 看完這一輯相,我也想去南極。

    回覆刪除
  11. 超多既企鵝, 唔講唔知綠色同紅色係咩. 南極天氣係咪冇北極咁好呢? 放假要多休息呀!

    回覆刪除
    回覆
    1. 未見過咁多企鵝, 好開心 :)
      唔..南極呢個trip天氣麻麻 >.<
      知道 ^.* 多謝關心

      刪除