Day 15南極第六站──說好的Port Lockroy與Base Brown

**南美、南極篇使用粵語

好叻呀，要自讚！南極咁多相，我竟然keep到一星期一篇呀，係咪抵讚先\(^0^)/

其實今篇咁快嘅原因呢，相信同冇land過有關，啲相唔算好多。話說之前嗰晚郵輪上個行程簡介會話會land兩個地方嘅，朝早land Port Lockroy；下晝land Base Brown，點知兩度都land唔到，於是夜晚補咗個boat cruise，咁呢日都叫做有離開過艘郵輪。

朝早起身食過早餐就去聽講座。
愈南遇到愈多大型浮冰，見到餐廳落地玻璃外由冰川甩出嚟嘅大浮冰嘛？

聽完講座就出甲板望望，啲風吹到人都企唔穩，再睇吓海面，啲浪真係好唔嘢少，霧又大。

其實呢，Day 14嗰晚已經到咗Port Lockroy架喇，睇下方地圖。之前land嗰個Damoy Point就喺Port Lockroy正隔鄰，真係我呢啲游水唔多叻嘅都游得到去嗰種距離，所以喺地圖上好似兩點重疊咁，如果大家仲記得Day14嗰篇，我哋land Damoy Point時天氣奇差，所以郵輪嗰晚冇航行，諗住等到朝早天氣好的話就可以land到Port Lockroy，而Port Lockroy係大家都期待嘅登岸點嚟，因為呢度有間郵局，可以喺南極寄出信件到世界各地。

Expedition Team Leader終於宣佈因為天氣差而放棄land Port Lockroy，郵輪啟航去下個登岸點Base Brown。由於Port Lockroy係重要景點，因此回程時郵輪會land番。

食午飯，郵輪上啲麵包好香脆！

飯後上甲板，呢邊天氣好似幾好喎，雖然有霧，但有太陽呀！

好靚、好有規模嘅冰川，雖然風大，但真係唔捨得離開甲板！

嚟到位於天堂灣Paradise Harbour 嘅Base Brown／Almirante Brown喇，呢個係阿根廷喺南極嘅基地。之前嗰晚個簡介會話原本駐守喺呢個base嘅醫生，因為適應唔到極地嘅生活而患咗精神病，仲放火燒毀咗個基地，好在所有人都俾美國搜救隊拯救咗。宜家我哋見到嘅係喺八十年代尾開始，由阿根廷派員喺每個夏天逐啲重建而成嘅，可惜近年阿根廷經濟麻麻，已經再冇派員嚟駐守喇。

呢度仲有Gentoo Penguins架，上圖橙色小屋旁，不過我支天涯鏡zoom唔到咁近喇。

以為有得land啦，點知只係有得睇咋，expedition team leader宣佈風大不宜登岸，我估係海嘅current太勁，搭快艇登岸會危險。

郵輪啟航繼續南下。企喺甲板太耐，好凍，入室內食個下午茶同飲杯熱飲先，跟住再影過！

聽翌日行程講座，郵輪翌日將會越過南極圈線，然後情況許可就可以踏足南極圈內嘅土地。好期待呀，一向對緯度好有追求嘅我覺得踏足南極洲唔算係真正嘅南極，一定要入咗南極圈先算數！

講座後又上甲板投奔我愛嘅冰雪世界！

下圖白色羽絨個球體就係我喇！甲板條走廊都鋪滿雪霜，係南極夏天嘅雪，好愛好愛呢個咁特別嘅地方！世上只此南極一家有夏雪，北極要到初秋先有。

到Lemaire Channel喇，呢度係出名景色靚嘅南極水道，兩邊有高山夾道，呢個南極水域因為被高山所擋，所以冇乜強風，海面都比較平靜，不過據講某啲月份有機會被冰山堵塞。

由於今日冇land過，於是補咗個boat cruise，晚飯後就到我哋嗰組出發喇。

我哋架小艇由墨西哥籍嘅expedition team member帶領，可以睇到幾多冰、幾多動物，就全靠佢嘅經驗喇。

船河中遇過兩次海豹

好近呀，上圖左下角就係我喇！

回程遇到一舊好特別嘅海冰，好藍、好靚！

最怕唔知自己去咗邊，影番低郵輪上個mon先，船河呢度喺Booth Island附近嘅海域。

上返郵輪剛好係日落時間，二月份南極嘅夏天，日落時間大約係晚上十點。

紫色嘅晚霞，總算為land唔成嘅呢日做番啲心靈補償。

下篇郵輪將會越過南極圈，待續

到南極郵輪、阿根廷、巴西伊瓜蘇2016目錄頁


到「Venus遊世界」總目錄

您可能會對以下博文感興趣:

加拿大白馬周邊	大加納利島	新西蘭南島	格陵蘭海上極光

Copyright © 2017 by Venus. All rights reserved.