Day 17南極第八站──Petermann Island

**南美、南極篇使用粵語

郵輪生活好規律，朝早起身就去餐廳食早餐。而早餐係三餐裡面最啱口味嘅，水果、粥、yogurt、橙汁都係每日必選。

早餐後出甲板望望，好寒，天色唔係咁好，有雨兼大霧。

原定朝早會land Fish Island／Prospect Point一帶，但因為天氣差，最終取消咗。補咗兩場講座，反正冇乜嘢做，照坐入去聽聽。

聽完講座又食喇，西餐真係唔可以多食，味濃又膩，去到郵輪尾聲已經食到怕怕，係咁易食少少就主力食包。呢間挪威船公司啲麵包焗得好好味，搭Hurtigruten的話記住要試。咦，醒起喺挪威係未食過唔好食嘅麵包嘅，應該話去親挪威都要食包至真！

下晝終於可以登岸喇，望望地圖先，郵輪已經由南極圈上番去南緯65度10分嘅Petermann Island喇，一諗起回程中就有啲失落。

登岸嘅時候微雨，有啲狼狽，而且影相好唔方便，好在行行吓終於停雨。

睇吓，落雨落到積水，企鵝喺度玩水。呢度啲企鵝都幾慘慘，啲便便多數係綠色，即係佢哋捉唔到魚同蝦食，要食海藻喇 >.<

島上有間上世紀50年代起嘅Argentine refuge，宜家久唔久會有隔鄰Vernadsky基地（我哋翌日嘅登岸點）嘅工作人員過嚟visit。

島上應該見到Adélie penguins、Blue-eyed shags，呢度亦都係最南嘅Gentoo penguin colony。有見到Blue-eyed shags，不過影唔到，影到嘅只得Gentoo penguins，相信係因為我唔肯行遠，所以冇喺呢度見到Adélie penguins喇。

海邊啲雪好跣，我已經小心翼翼咁堅持行到上山，點知山上啲深雪有另一個難度，係唔跣呀，不過每步都起碼有一半小腿咁深，有啲甚至深到接近膝蓋，我驚自己跌嘅時候會整爛支鏡，於是收番好部相機慢慢行，所以山上就冇相喇，我哋行到見到島嘅另一邊個灣就回頭喇。喺山上坐咗落雪地好幾次呀，雖然雪地軟綿綿係唔痛嘅，但好難行，成日俾雪trap住隻腳就跌喇 >.<

返上郵輪換好衫就去餐廳晚飯，然後去聽翌日行程預告。

夜晚出甲板影相，遇到另一艘南極郵輪，可以搵佢做冰川嘅scale比對。

另一邊望番剛才land過嘅Petermann Island。

夜晚十點有Fruit and Ice carving show，上次北極三島郵輪我因為沖完涼唔願離開間房而miss咗，淨係睇老公影番嚟嘅相，今次一定要睇現場！

有三個活動同時進行，包括冰雕、雕水果同摺餐巾，呢場show值得睇呀！

返房時見到房門口夾咗入南極圈嘅證書喇，yeah！

下篇郵輪擬land Vernadsky Station同再試之前因為天氣差而land唔到嘅Port Lockroy，希望順利啦，待續。

到南極郵輪、阿根廷、巴西伊瓜蘇2016目錄頁

到「Venus遊世界」總目錄

您可能會對以下博文感興趣:

購物及藝術在紐約	大加納利島	新西蘭南島	格陵蘭海上極光

Copyright © 2017 by Venus. All rights reserved.