Day 18南極第九站上篇──Vernadsky

**南美、南極篇使用粵語

Day 18預算有兩次landings，分別係Vernadsky同之前因為天氣差而land唔成嘅Port Lockroy。可以預告今次係順利嘅，因為land咗兩次，相片太多所以分開上、下篇，今篇只記Vernadsky Station。

朝早起身望出窗外，微雨！唉。。。個心沉一沉！都要起身食早餐啦，因為land得成的話，第二組就到我哋。

好在之後廣播傳嚟好消息，land得成呀，驚喜！搭快艇上到岸嘅時候仍然落住毛毛細雨。

Vernadsky Station位於Galindez Island，係Ukraine嘅科研基地。呢度以前係英國嘅基地，啲base staff見悶悶哋就喺度起間pub，叫Faraday，真係聽到O晒嘴，去做科研定嚟玩？！到後來Ukraine獨立，英國就以1英鎊將呢度賣咗俾Ukraine，Ukraine接手後就將呢度命名為Vernadsky。嗱，實情唔係英國大方呀，而係佢唔想再keep咁多南極基地咋，洗費好大架嘛，但要喺唔傷害環境嘅高規格下撤走物資亦都要洗好多錢喎，咁咪做個順水人情囉！

登岸後由Ukraine科研人員接待，可以入內參觀。

 室內環境

上圖左上角保留番英國當年建立嘅pub。登岸當日，科研人員準備咗vodka歡迎我哋。

呢度亦都有世界最南嘅Souvenir shop，見右上圖。圖中間可以見到有郵遞服務，會經Ukraine寄到世界各地。

經測試，三個幾月終於寄到香港喇！之前喺facebook專頁post過。

喺室內出嚟之後停雨喇！Vernadsky Station一隅，仲有可愛企鵝。

好啦，係時候上番郵輪喇！臨別趁天色好影多次個牌留念先。

 今次協助我哋上快艇嘅expedition team member－－後面黑色衫嗰位，佢係呢間挪威船公司首次聘請嘅內地科學家，喺北京大學畢業，係生物保育學博士，斯斯文文咁，成日都好好笑容，相當討好！

上郵輪換好衫，影吓我哋anchor嘅位置先。

天色咁靚，要出甲板慢慢欣賞、慢慢影，係我最鍾意嘅白色世界！仲要係白色冰雪配藍天，我覺得係絕色兼絕配！

下圖舊石睇落唔係咁大，但睇埋下圖左方架快艇，係咪即刻會感嘆世界之大，同人嘅渺小呢！

午飯時間

飯後天色轉差，又上甲板影多轉，唔可以話灰色世界唔靚嘅，有另一種味道，但俾人嘅感覺就冇咁開心喇！

由於郵輪仲anchor緊，所以可以做個藍色同灰色喺同一個景物下嘅比對。

跟住郵輪繼續返航北上，再次經過Day 15介紹過嘅，以優美景色聞名嘅南極水道──Lemaire Channel。今次最唔同嘅地方係，由當日嘅大風兼灰濛濛變成今日嘅風和日麗！呢度我發咗癲咁影，啲相好多好多！

好開心，有人留住我影相嘅時候，同我心繫嘅南極白色世界一齊。舉機呢個動作一定佔據咗我郵輪生活嘅好大部份時間，或者真係僅次於瞓覺時間。

睇睇吓啲曾經這麼近，現在卻那麼遠嘅脫俗美景，忽爾有啲失落，我真係好掛住南極呀。。。。。。幾時先可以再見番呢啲靚到唔識點形容嘅冰川同倒影？

由於Lemaire Channel係一條有高山夾道嘅水道，海面平靜而且安全，所以有唔少郵輪取道。我哋喺度遇到另一間郵輪公司嘅南極郵輪，大家都好興奮咁互相揮手！

再影多一輪就去食tea歇一歇。

見到咁多人企喺甲板，就知Lemaire Channel有幾平靜，只要大風啲，甲板就得小貓三幾隻，我會係甲板上其中一隻好有耐力嘅小貓！

下一站係Port Lockroy，會係好天色下嘅landing，待續。

到南極郵輪、阿根廷、巴西伊瓜蘇2016目錄頁


到「Venus遊世界」總目錄

您可能會對以下博文感興趣:

馬爾代夫	大加納利島	澳洲悉尼	北緯78度-朗伊爾城

Copyright © 2017 by Venus. All rights reserved.