2016年10月2日 星期日

Day 13 南極第四站上篇──Wilhelmina Bay


**南美、南極篇使用粵語


堅持唔到添,甩咗每星期嘅約會,兩星期先發文!俾我懶一次,會儘量keep番一個星期一篇架喇 ^.* 唔知做乜,日日放工後都手軟腳軟,冇晒能量咁攤軟喺屋企,個腦同身體都唔想郁,之前個星期懶到一次運動都冇做添呀!迫自己剛啱個星期乖番,運動咗兩日,希望嚟緊嘅日子都可以堅持到!


吖,近來個blog啲舊相爛爛吓咁,嗰批相係放喺google drive嘅。本小姐好有心機維護個blog架嘛,好想次次都見到完完整整、靚靚仔仔咁,唔知google搞乜,幾時先好番架?!暫時都冇乜法子,因為搬相係一項偉大工程,如非必要都唔會做呀  >.<


續遊記喇,其實呢篇冇乜字架,因為呢朝早淨係喺Wilhelmina Bay觀鯨,但因為影鯨吓吓用連拍,所以相片數量多到好離譜,勁難揀!


早餐後有廣播話有鯨影,呢個海域真係多鯨喎,影咗兩個幾鐘,係Humpback嚟嘅,去相..



























































講真我欣賞個白色世界多啲,實景好壯觀、好有氣勢。北極係冇咁雄偉嘅冰山架,只此南極一家!啲冰仲要白裡泛藍,睇得出嘅純淨,就算天色唔好仍然覺得景物好靚!






















郵輪有段時間停駛咗,可能因為冇咗引擎聲,有條Humpback游到好近,近到黐住船舷咁滯,呢幾張相朦咗嘅左邊就係船身嚟,我喺五樓甲板拗晒腰伸咗半個身出船影,感覺近到伸手就可以掂到條鯨魚咁,完全感受到佢身軀嘅龐大!








再嚟白色世界,靚到震撼級別!有幾張啲光線特別靚,終於喺雲度透到少少陽光出嚟,即刻靚到有置身世外桃源嘅感覺!




























喺呢個海域仲遇上海豹



Crabeater seal


喺甲板影冰、影鯨、影海豹,唔經唔覺凍咗兩個幾鐘,為免冷病都係入返船艙暖吓身先。





























抖抖吓喺房窗見到出面落雪,係盛夏嘅雪呀!!!!!!除咗南極,試問仲有邊度會有夏雪?!即刻著番羽絨出甲板感受吓二月初南極夏天嘅飄雪,有一種淒美動人嘅感覺!




呢個時候出甲板凍得好犀利,邊個話落緊雪唔凍架,好記得呢嘢出甲板明明著住羽絨,但係股寒氣係透入羽絨入面架,企咗一陣就覺得頂唔順要入返船艙。









午飯之後停咗雪,出番甲板影冰,真係唔識點形容呢種靚,係純美?!氣勢美?!











見到前方架小船嘛?小船上面有位德國探險家,夜啲佢會上郵輪做分享。


到咗下晝嘅登岸點Cuverville嘅對開海面喇,郵輪anchor,可以見到岸上嘅企鵝喇,待續






南極郵輪、阿根廷、巴西伊瓜蘇2016目錄頁

「Venus遊世界」總目錄


您可能會對以下博文感興趣:
加拿大白馬 大加納利島 wanaka 極光
加拿大白馬周邊
大加納利島
新西蘭南島
格陵蘭海上極光

Copyright © 2016 by Venus. All rights reserved.

10 則留言:

  1. 南極既冰川真係好純淨, 夏天都有落雪, 睇見你影既相就覺得南極好靚. 唔怪之得可以係甲板影左咁耐相啦. 我放工後大部份時間都倦到爆, 返到屋企要閉門休息架啦.

    回覆刪除
    回覆
    1. 係好靚, 仲有嗰種壯闊嘅震撼感覺
      其實我算係最抵得冷嗰小眾, 覺得啲船友都幾錫身, 不過真係好凍吓, 雖然係夏天
      大家都加油, 錢真係唔易賺, 體力同腦力都好透支

      刪除
  2. 南極冰層好藍呀好靚
    原來北極冰層唔喺咁呀?
    鯨魚喺水下妳都分到乜嘢品種,勁呀
    好陰功呀,吹咗兩粒鐘冰風,不果感覺到大自然好神奇呀!

    回覆刪除
    回覆
    1. 我都好鍾意嗰種冰藍
      唔..格陵蘭嗰邊啲冰山冇咁大規模, 去完北再睇南嗰啲, 係震憾好多。至於阿拉斯加嗰邊啲冰山喺飛機上面睇都好有規模, 但因為冇喺船上睇過, 所以唔知同南極有冇得揮,但我估都係南極靚。
      嘻嘻, 因為船上有宣佈嘛, 同埋睇睇吓都識分囉, 之前北極嗰次第一次睇就夢好多。
      自願嘅, 所以唔陰功, 其實好多船友影一陣就返入船艙, 有啲就不斷出出入入, 暖吓身再凍過, 我就有嘢影就唔記得凍

      刪除
  3. 係喎! Blogger d舊文照片有時無左,究竟想點。。。 唔想連這些分享空間都無埋呀!
    見你今日嘅相,絕對是烏雲蓋頂呀!

    回覆刪除
    回覆
    1. 係呀, 唔多穩定呀, 不過忙到爆, 唔理喇, 有時間先執整
      南極天氣變幻莫測, 好天色難求, 或者唔係乜都睇唔到已經算係咁

      刪除
  4. 若要再搬相真係惡夢,好麻煩......
    冒寒風影兩個鐘相,你真係好有毅力,讚^^
    不過見到咁靚嘅景又真係好有動力
    又有鯨魚又有海豹又有鳥仲有夏雪,好精彩唔怕影到悶

    回覆刪除
    回覆
    1. 係呀, 係諗吓都煩, 如果要搬又會有一批bloggers放棄寫架喇
      多謝讚賞, 我都覺得自己好強呀, 總之有嘢影就唔記得凍
      係呀係呀, 雖然我麻麻影動物, 不過都覺得應該要記錄吓自己同佢哋見過面 :)

      刪除
  5. 係囉..有好多張相都無左一半!!!可惡呀!!!點解會咁??係咪因為換左相薄呀??之前係用緊picasa依家轉左google相薄?
    不過南極的冰唔係一般既靚~係極度靚~~~~~~~

    回覆刪除
    回覆
    1. 唔係喎, 之前picasa嗰啲順利過渡, 反而係yahoo blog年代啲相之前搬咗去google drive, 係嗰批相顯示唔到囉, 唉, 都冇時間研究乜事, 由得佢爛爛吓咁先, 長假期先算囉 >.<
      係呀, 嗰種藍真係好動人

      刪除