2017年8月24日 星期四

Day 23-25從南走到北──阿根廷布誼諾斯艾利斯、荷蘭阿姆斯特丹


**南美、南極篇使用粵語

冰島、波羅的海三國之旅返港剛好一星期,呢個trip大部份日子天色都好好,仲見到我一直好想見嘅puffin,好滿足、好盡興!
原本想星期日發文,不過時差令到作息混亂,都係提唔起勁寫 >.< 星期一返咗工喇,一切都回復正常。十號風球吽喺屋企,係時候完成南極之旅嘅最後一篇博文喇!要完嘅始終都要完,唯有寄望將來啦,仲有幾個南極嘅地點想踏足,仲想見多幾種企鵝,南極等我呀,我會再嚟架!


續遊記


Day 23

喺布誼諾斯艾利斯Buenos Aires留多半日,就會搭下晝四點幾嘅航班由阿根廷飛去中轉站荷蘭。



朝早喺酒店食早餐,我通常好快食飽,今次竟然係老公開聲問我嘆完未,話已經嘆咗個幾鐘。





老實講,食物水準冇驚喜,但我從來都鍾意享受環境,喺好嘅環境氣氛下自然會放慢動作,泡泡茶,慢慢嘆。


上篇提過我唔係咁欣賞呢間頂級酒店嘅style,但喺嘆茶中觀察服務生嘅衣飾同服務水準,絕對認同呢間係傳統嘅頂級酒店!





嘆夠就影吓大堂然後喺附近行吓,呢朝得一個景點,如果想睇Buenos Aires嘅其它景點,請click入連結睇番 Day 5-7



Alvear Palace Hotel外觀


行經商場,不過太早,啲舖頭未開。


雖然Buenos Aires已經係南美洲嘅繁華大城市,但行街真係要望地下,因為好多時會見到啲地磚爛咗或有大窿,容易拗親。我嘅相機從來唔影衰嘢,呢張唔覺意影到就post吓,呢笪唔算爛得勁,有啲仲誇張!



Buenos Aires一隅,開24小時嘅麥記。







到今朝唯一嘅景點El Ateneo Grand Splendid由一間近百年歷史嘅歌劇院改建成書店,曾被英國衛報The Guardian譽為世界上最靚書店嘅第二位,置身其中,完全認同佢嘅美喎!





跟住就行返酒店執行李喇,Buenos Aires一隅。



Check-out後請酒店職員幫手叫架的士去Buenos Aires嘅國際機場EZE



機場一隅、Lounge






登機喇,十三個幾鐘之後就會由熱辣辣嘅南半球夏天飛到去落緊雪嘅北半球冬天。



最鐘意睇地圖,以今次望住呢個航線圖最滿足,係南美洲呀,第一次踏足!呢個trip之前,只係去過五大洲,今次一次過踏足埋南美洲同南極洲,七大洲齊晒喇,有一種感動!



荷航KLM啲飛機餐認真麻麻,不過我對飛機餐從來冇要求,唔好食就食少啲當減肥。





Day 24-25




荷蘭時間朝早十點幾到埗,我哋啲行李直掛香港,可以輕裝出市區玩。



步出禁區先醒起原來係情人節,第一次喺外地過情人節,其實之前大家都冇諗到。




Amsterdam轉機幾好,因為火車出市區好方便亦都唔遠,如果買唔到接得靚嘅connecting flight,不妨揀隔幾個鐘嘅,順便出去玩吓。我哋呢班機早上十點幾到Amsterdam,接續嘅返港航班揀咗下晝五點幾,夠玩市中心。



喺接近四十度嘅Buenos Aires嚟到零下幾度嘅Amsterdam,我哋入面著短袖,外披一件厚衫。喺中央火車站貢出嚟嗰吓,連我呢個唔怕凍嘅火人都覺得凍!好,勇者無懼,勇敢行出去就會適應架喇!




回望阿姆斯特丹中央火車站,就算灰濛濛嘅落雨天都覺得靚。



運河上嘅觀光船




行行吓,雨越落越大,鞋襪都濕埋,影相又唔方便,凍到痴線,於是匿番入火車站行陣商場先。



見細雨咗再嚟過,今次行行吓落雪添!情人節再加一個落雪嘅情景,理應浪漫到暈,但喺著唔夠衫,仲要鞋襪盡濕嘅情況下,只係覺得凍到暈 >.<



遙望The Basilica of Saint Nicholas




我哋冇再入番火車站匿,採取邊行邊匿策略,諗住拿拿聲行完就返入機場。



剛才遠望嘅The Basilica of Saint Nicholas天主教堂,宜家置身其中喇!








市內一隅


市內最著名地標之一──水壩廣場,而廣場上嘅白色石柱係紀念二戰死者嘅國家紀念碑。



Koninklijk Paleis AmsterdamRoyal Palace阿姆斯特丹王宮,於十七世紀興建時作市政廳用途,後成為皇宮。



Nieuwe KerkNew Church教堂,建於十五世紀。



Magna Plaza,現為購物中心,前身係郵政局,當然又要入去暖吓身啦!

近近哋嘅景點行晒,決定提早回程,行返火車站喇!


途經Sex Museum,好多人排隊等入去,我就冇興趣喇。以前荷蘭俾我嘅印象就係sex & drugs,都係近年先冇咁負面。咦。。見唔見Sex Museum上面寫住Venus Tempel(意即The Temple of Venus),真係多謝晒 >.<



入到機場差唔多兩點,我哋搭五點幾機,時間多著,於是又去lounge hea吓,順便整番乾對襪。






好喇,再嚟十一個鐘機程就返到香港。好漫長呀,南美真係好遠 >.<


呢程亦都係提供兩餐,食物就呢程機好食過之前嗰程,不過都係嗰句,飛機餐唔會期望好食,只求唔好太難食或者太肥膩。





返到香港喇,極罕農曆新年外遊,影吓機場嘅裝飾擺設先。






好啦,寫完南美、南極之旅喇,我唔會忘記呢個純美嘅白色世界所帶俾我前所未有嘅美感經驗,等我,我一定會再踏足南極!


南極郵輪、阿根廷、巴西伊瓜蘇2016目錄頁

「Venus遊世界」總目錄


您可能會對以下博文感興趣:
紐約 大加納利島 wanaka 極光
購物及藝術在紐約
大加納利島
新西蘭南島
格陵蘭海上極光

Copyright © 2017 by Venus. All rights reserved.

6 則留言:

  1. 嗰十幾個鐘體驗由熱辣辣到冷冰冰,可以想像你地既健康狀況幾咁好。

    回覆刪除
    回覆
    1. 我諗住好快返到香港, 就算冷親都冇緊要 :)

      刪除
  2. 希望將來飛行科技再先進啲,有超音速飛機可以幾個鐘直飛南美wakakaka...

    回覆刪除
    回覆
    1. 嘩, 好呀, 宜家個飛行時間實在好令人卻步呀

      刪除
  3. 華~~寫完一個遊記~多謝你~帶我去睇南極世界~
    個圖書館勁靚!
    華!!原來EZE個lounge咁靚架!!!!!!!!只可惜上年未申請依家張信用卡

    回覆刪除
    回覆
    1. 咁我都要多謝妳帶我去好多地方喎 ^.*
      環境好, 不過冇乜嘢食。唔緊要, 遲啲去過 :)

      刪除