2016年9月19日 星期一

Day 12 南極第三站下篇──Deception Island/Whalers Bay


**南美、南極篇使用粵語



上回講到朝早land完風和日麗嘅長城站,郵輪啟航後仲有半個天係藍天白雲。


三點幾食完tea再上甲板就發現個天起晒厚雲,跟住仲灑咗幾滴雨。






由於黃昏至晚上有登岸嘅關係,所以下晝五點就可以到餐廳晚飯。其實之前嗰日嘅行程講座叫首先登岸嗰四組喺完成landing後先晚飯,我哋係Group 4,今次輪到首land,應該登岸返嚟先食,但我哋見架郵輪行得慢過原定時間,於是決定餐廳一開就入去食咗先。最後接近七點先宣佈登岸,遲咗好多吓,如果跟講座咁講登岸返嚟先食就應該唔洗食喇,因為餐廳提早開就提早收,當日個行程表印住餐廳八點半就休息!


晚飯後郵輪差唔多到登岸點Deception Island。睇吓Deception Island嘅形狀,然後試想像佢原本係一座火山,因為爆發得太利害令到個火山口collapse咗,跟住呢個破火山口俾海水淹浸埋就形成Port Foster喇!真係好鍾意呢啲咁特別嘅地貌!




冇耐聽到廣播叫乘客出甲板影相,因為郵輪將會駛入Deception Island200米闊嘅入口,上數圖嘅前方就係入口。









入咗Whalers Bay喇,Whalers Bay係近入口處嘅一個海灣,下圖紅框。










郵輪anchor,我哋返房換衫準備登岸。雖然天色麻麻,我哋登岸嗰陣仲灑咗陣微雨,不過灰濛嘅Deception Island彷彿有一種淒美!嘻嘻,大家係咪諗緊:"藍天白雲就話靚,灰濛又美呀?!"係,我認我偏心,但真係有另一種味道架,都靚喎 ^^



Deception Island上有建築、有廠房,因為呢度曾經係捕鯨基地,仲喺度設廠處理捕獲嘅鯨魚。























































一登岸就見到gentoo penguins


















行行吓見到有幾隻Antarctic Fur Seal,呢種要保持距離,啲海獅好大隻,而且對聲音好敏感,我愈企愈開,驚佢走過嚟。













成年嘅同年輕嘅kelp gull




Skua,喺南極成日見到嘅鳥類,體型都幾大。





行上去可以睇到南極最大嘅cemetery >.< 見到山頂上有啲人嘛?!鍾意hiking嘅行咗上山頂,利害!




按時返番去等小艇,剛好見到有位男士換緊衫準備落水。





Deception Island原本係一座火山,即係有地熱啦,所以據講呢度嘅水溫偏暖。之前有提過可以帶泳衣嚟游水,肯落水嘅會獲頒證書證明喺南極游過水。由於老公唔識游水,所以佢出發前已經力勸我去做呢個壯舉,仲笑我件泳衣多布過人哋件面衫,肯定船上個攝影師唔會影我,叫我唔洗驚!我梗唔制啦,萬一俾人影咗相點算,嘻嘻,我影人好過啦 v(^0^)v 我好自律架,未問過人意願當然唔影近鏡啦,更加唔會影女性,純粹記錄吓南極暢泳呢個活動就夠。上快艇前我哋有用手試過啲水溫,都幾凍架,但島上有幾個位置有溫泉,睇嚟唔喺whalers bay呢邊喇。




返到郵輪剛好八點半,係餐廳今晚嘅休息時間。有幾個同坐一架快艇嘅一除咗救生衣同muck boot就跑去餐廳,我哋雖然食咗飯都上去八吓,見餐廳過咗八點半都俾入,近九點就改為抄低房號安排送食物入房,其實一定有啲更遲返,相信九點前返得到嘅都係頭兩組登岸嘅,仲要係肯準時返上船嘅,但個講座叫頭四組都喺登岸後先食囉。之後當然係周圍聽到人講呢個失當安排啦,行過front desk都聽到有人投訴緊,真係有啲人成晚冇飯食呀!


下一站將會離開South Shetland Islands南下南極半島,待續



南極郵輪、阿根廷、巴西伊瓜蘇2016目錄頁

「Venus遊世界」總目錄


您可能會對以下博文感興趣:
新西蘭南島 飛機上看極光 冰島金環 挪威極光
新西蘭南島
北歐詩麗雅郵輪
冰島金環
挪威實現極光夢

Copyright © 2016 by Venus. All rights reserved.

17 則留言:

  1. 咁依家仲係咪活火山會爆發?
    唔講真係唔知南極也有活火山.....
    個小鎮都好荒涼,依家係咪已經無人居住?
    企鵝個咀紅色好搶鏡
    如果唔識游,咁著泳衣在岸邊試下浸水都幾好玩喎,見依家好多興著由頭包到落腳的防晒衣

    回覆刪除
    回覆
    1. 唔係喇, 對上一次爆發係60年代
      係囉, 冰火好似混唔埋咁
      南極冇settlements, 留低嘅都係科研人員或者因為某啲目的而短暫停留嘅, 60年代火山爆完後就嚇走晒啲人lu
      係呀係呀, 啲沙又深色喎, 個嘴影出嚟特別sharp ^^
      又怕冷親, 又怕俾人影到, 所以咪搞 :p 我都想見識吓伊斯蘭嘅布堅尼同內地嘅面堅尼

      刪除
  2. 我覺得個入口有d雲霧好有神秘感~~~
    即係好似我去冰島咁~就算佢陰天又好~晴天又好~我都覺得各有美態~~~~~~
    真係安排好差喎~~~佢咁遲先land應該做廣播叫佢食飯先嘛..一係就叫餐廳遲少少先收!!!好彩你醒咋!!!
    好想攞手擦下企鵝d肥肚腩~~~一定好得意~~~~~
    你有無問過游水哥位先生d水係咪真係唔凍呀?!?!!?南極喎~~~~~~
    好有型呀我覺得係南極游水!!!!!!!!!!!!

    回覆刪除
    回覆
    1. 仲喺正個入口度, 令到個島特別神秘
      完全同意! 我哋究竟係持平定偏心呢, 但真心覺得各有美態架喎 :)
      咪囉咪囉, 明知遲咗, 但廣播仲有提頭4組登岸返嚟先食囉
      我真係好鍾意啲肥嘢, 得意到暈
      冇呀, 佢未上岸我哋就上咗快艇喇, 但睇佢唔係急急腳游番上嚟, 覺得啲水應該係可接受嘅凍
      係好型呀!!!!!! 不過船上個攝影師好鍾意影啲參與活動嘅乘客放入隻CD度賣。以上次北極嘅經驗, 都幾多人買隻CD架。可能阿攝影師覺得放多啲乘客相落去, 被影到嘅會買番卦! 我堅驚囉, 等陣真係影咗放埋入去就大劑, 咪有好多人睇到囉, 啲相仲會喺郵輪上每日無限loop, 真係冇眼睇 >.<

      刪除
    2. 無錯無錯~~同意~
      我覺得每次都覺得自己睇到既係最美既人~係懷有感恩的心呢~~~~~
      即係遲左都無特別安排...好彩你無信佢咋...
      企鵝真係勁得意~係阿根廷睇到都好興奮~~~~
      咁就真係...唔係幾好喇...真係....隻碟可能流傳至世界各地....制唔過~~~~~

      刪除
    3. 係喎, 都感恩架
      冇特別安排呀, 係堅持繼續錯落去 >.<
      小動物都好得人鍾意 ^^
      嘻, 其實得自己介意, 正所謂顯醜不如藏拙嘛 :p

      刪除
  3. 遲左登岸,有d人冇得入餐廳食飯,你地醒目識得睇航行慢就盡早食飯。
    島上房屋好多毀壞左喎.

    回覆刪除
    回覆
    1. 因為之前搭過呢間船公司, 見識過佢啲甩漏嘢, 所以覺得要自己執生, 唔好信晒佢 :p
      係呀, 60年代再爆多次火山後呢度就荒廢咗囉

      刪除
  4. 遊輪這樣近,可知水有多深。
    企鵝不怕熱嗎?

    回覆刪除
    回覆
    1. 唔知噃, 淨係有講過入口位嘅海水下面有舊石
      放心, 唔熱唔熱, 我哋land嗰個灘好大風好寒, 島上屬於microclimates, 唔同位置差別好大

      刪除
  5. 佢地做左咁耐, 唔明D 協調仲係咁差.
    我地都試過因為登岸而遲左入餐廳, 我地已經係準時回船, 偏偏果晚就係seated meal, 本來叫我地等下食第2輪, 但要等好耐囉. 我地決定唔等啦, 但就因為遲左(第一輪) , 餐湯同頭盤都冇得食!
    後來聽返, 到第2輪係超多人, 根本唔夠位坐!


    我都睇過d 報導話唔知邊個位水好暖, 可以浸溫泉呀. 哈, 浸到一定好過癮~~~~

    回覆刪除
    回覆
    1. 係囉, 唔係貪網上報名方便都未必揀番佢 >.< 今次都仲有類似妳嗰次嘅情況。仲有上郵輪嗰日部份行李送錯房, 好在我哋嗰兩件安全送達, 若果唔係有排擔心。到第二日仲見有人喺front desk等緊好心人拎番件行李出嚟!
      係呀, 我都睇過啲相

      刪除
  6. 呢個Deception島個名都幾得意,也多謝你講解個地形形成。
    廢墟攝影我幾鍾意架~ 南極廢墟!
    南極游水正呀! 唔知我夠唔夠膽怕唔怕凍呢?

    回覆刪除
    回覆
    1. 嘩, 乜樹咁客氣, 唔洗咁客氣架喎, 我睇你個blog都學唔少嘢喎 ^^
      嘻嘻, 唔理廢唔廢, 乜都影一餐 ^0^
      男士應該冇乜顧慮嘛?!

      刪除
  7. 好彩你醒目食左dinner先出去, 船公司應該見勢色唔對改安排啦!! 如果出埋去游水, 冇飯食, 真係慘慘豬.

    回覆刪除
    回覆
    1. 佢個廣播係堅持繼續錯 >.<
      係呀, 又凍又冇得食的話, 會更慘情

      刪除
  8. 南極夏天真好凍,冬天唔會有人去呀?
    好多企鵝...人類撤出又回復番佢地嘅世界。

    回覆刪除